एजेन्सी – क्याटलान क्लब बार्सिलोनाका कप्तान लिओनेल मेस्सीले आफूमाथि बार्सिलोनाको समस्या आउँदा लाग्ने गरेको आरोपबाट आजित भएको बताएका छन् ।

पछिल्लो पटक फ्रान्सेली फरवार्ड एन्टोइन ग्रिजमनका पूर्व एजेन्टले क्लबमा मेस्सीको आतंक रहेको आरोप लगाएपछि मेस्सीको यो भनाइ सार्वजनिक भएको हो । मेस्सीले अर्जेन्टिनाका लागि खेल्दै अन्तर्राष्ट्रिय ड्युटीबाट फर्कने क्रममा बुधबार रिपोर्टरहरुलाई यस्तो अभिव्यक्ति दिएका हुन् ।

‘ सच्चाई यो हो कि म आजित भइसकें । क्लबमा भएको हरेक समस्याको कारण म नै रहेको भन्ने आरोप छ,’ मेस्सीले भने,’ यो सबै हुनुका बाबजुद पनि मलाई सहज छैन । अहिले १५ घण्टा उडान भरेर आउँदा मलाई कर कार्यालयका प्रतिनिधिले सोधपुछ गर्छन् । म विश्वास गर्न सक्दिन यो सब भइरहेको छ ।’

मेस्सीको बार्सिलोनाको सँगको सम्झौता यसै सिजनको अन्त्यसँगै समाप्त हुँदैछ । मेस्सीले गत सिजनको अन्त्यपछि क्लब छाड्न चाहेपनि बार्सिलोनाले उनलाई जान दिएन । मेस्सीले कानुनी प्रक्रियामा जानु भन्दा एक वर्ष कुर्ने बताउँदै क्लबमा रहने निर्णय लिएका थिए । तर त्यसका बाबजुद मेस्सीमाथि पटक पटक प्रश्न चिन्ह उठ्दै आएको छ ।

पछिल्लो पटक क्लबका अध्यक्ष लगायत बोर्डले नै राजिनामा दिएपछि त्यसमा मेस्सीको नाम जोडिएको थियो । क्लबको मैदानभित्र मात्र नभएर बाहिरको गतिविधिमा पनि मेस्सीकै नाम जोडिन्छ । यसले गर्दा पनि मेस्सी आजित भएका हुन् ।

क्लबसँग सम्बन्ध सुमधुर नभएका मेस्सीलाई स्पेनको कर कार्यालयले पनि पटक पटक सोधपुछ गर्ने गरेको छ । सन् २०१६ मा मेस्सीले ४.२ मिलियन युरो आम्दानीको कर छली गरेपछि २ मिलियन युरो जरिवाना लगाएको थियो ।

यसबाहेक उनले २ लाख ५० हजार युरो जरिवाना तिर्दै २१ महिने जेल सजाय पनि मिनाहा गराएका थिए । स्पेनको कानुनअनुसार अपराधिक मुद्दा नलागेको २ वर्ष भन्दा कम सजायमा जरिवाना तिर्न पाउने व्यवस्था छ ।