एजेन्सी – स्पेनिस ला लिगा अन्तर्गत शनिबारको खेलमा क्याटलान क्लब बार्सिलोना र एटलेटिको म्याड्रिड भिड्दैछन् । खेल नेपाली समयानुसार खेल रातको १:४५ बजे सुरु हुनेछ ।

अंक तालिकाको तेस्रो स्थानमा रहेको एटलेटिको घरेलु मैदानमा जित हासिल गर्दै अपराजित यात्रा कायम राख्ने सुरमा हुनेछ । टोलीमा उरुग्वेली फरवार्ड लुइस सुआरेज र लुकास टोरेरा कोरोना संक्रमणका कारण उपस्थित हुने छैनन् । सुआरेजको अनुपस्थितिमा जोआओ फेलिक्सले टोलीको आक्रमण सम्हाल्नेछन् ।

मिडफिल्डर हेक्टर हरेरा र डिफेन्डर सिमे भर्साल्को चोटका कारण टोलीमा रहने छैनन् । स्टेफान साभिच, डिएगो कोस्टा र भिटोलो पनि चोटका कारण खेल्ने नखेल्ने शंका छैन । मिडफिल्डमा अघिल्लो साता मात्र क्लबमा आएका मिडफिल्डर जिओफ्रे कोन्डोग्बियाले खेल्ने सम्भावना रहेको छ ।

यता बार्सिलोनाका लागि मिडफिल्डर सर्जियो बुस्केट्स स्पेनसँग रहँदा लागेको चोटका कारण टोलीमा रहने छैनन् । उनीसँगै डिफेन्डर स्यामुएल उम्टिटी, रोनाल्ड अराउजो र अन्सु फाती पनि अनुपस्थित रहनेछन् । मिडफिल्डर फिलिपे कोउटिन्हो भने टोलीमा फर्कनु बार्सिलोनाका लागि सुखद रहनेछ ।

फ्रान्सेली फरवार्ड एन्टोइन ग्रिजमनले आक्रमण सम्हाल्ने सम्भावना छ । उनलाई कप्तान लिओनेल मेस्सी, मौसा डेम्बेले र पेड्री रहनेछन् । मिडफिल्डमा फ्रान्की डे जोङ र मिरालेम प्यानिच खेल्नेछन् । कोउटिन्होले बेन्चमा रहेर खेल्ने सम्भावना छ ।

एटलेटिकोले ला लिगाको पछिल्लो २३ खेलमा हार बेहोरेको छैन ।पछिल्लो ६ मध्य ५ खेलमा टोलीले कुनै गोल पनि खाएको छैन । यता बार्सिलोना भने एटलेटिकोविरुद्ध सबै प्रतियोगितामा खेलेको पछिल्लो ११ मध्य १० खेलमा अपराजित छ ।

एटलेटिको ७ खेलमा १७ अंक जोड्दै लिगको तेस्रो स्थानमा छ । एटलेटिको लिगमा अपराजित एकमात्र टोली हो । आठौं स्थानमा रहेको बार्सिलोनाले ७ खेलमा ११ अंक जोडेको छ । टोलीले ३ जित, २ बराबरी र २ हारको नतिजा निकालेको छ ।

यो पनि पढ्नुहोस :

एटलेटिकोमा फेलिक्सको उदय