एजेन्सी – दुई गोलले पछि परेको स्थितिमा रोमेलु लुकाकुले दुई गोल गर्नुका साथै दुई असिस्ट दिएपछि इटालियन सिरी ‘ए’ मा इन्टर मिलानले टोरिनोमाथि ४–२ को पूनरागमन जित निकालेको छ ।

इन्टरको पूनरागमन जितमा एलेक्सिस सान्चेज र लोउटारो मार्टिनेजले पनि गोल थपे । टोरिनोको सिमोन जाजा र क्रिस्टियन ड्यानियल एन्साल्डीले गरेको गोल सान्त्वना बन्यो । मिलानोमा आइतबार राति भएको खेलमा घरेलु टोली पहिलो हाफको इन्ज्युरी समयमा सिमोन जाजाको गोलबाट पछि परेको थियो ।

६२औं मिनेटमा क्रिस्टियन ड्यानियल एन्साल्डीले पेनाल्टीमा गोल गर्दै टोरिनो अग्रता दोब्बर पारे । एस्ले योङले पेनाल्टी बक्समा वेलफ्रेड सिंगोलाई लडाएपछि रेफ्रीले भिएआरको सहायता लिदै टोरिनोलाई पेनाल्टी प्रदान गरेको थियो ।

दुई गोलले पछि परेपनि हरेस नखाएको इन्टरले ६४औं मिनेटमा एलेक्सिस सान्चेजको गोलमा खेलमा फर्कने संकेत दिए । रोमेलु लुकाकुको प्रहार क्रसबारमा लागेर फर्किदा सान्चेजले रिवाउन्डमा गोल गर्न सफल भएका थिए । ६७औं मिनेटमा सान्चेजको पासमा लुकाकुले गोल गर्दै खेललाई २–२ गोलको बराबरीम ल्याए ।

८४औं मिनेटमा लुकाकुले पेनाल्टीमार्फत व्यक्तिगत दोस्रो गोल गरेपछि इन्टर मिलानले खेलमा ३–२ को अग्रता लिन सफल भयो । अचरफ हाकिमीलाई निकोलस एनकोउलोउले लडाएपछि रेफ्रीले भिएआरको सहायता लिदै इन्टरलाई पेनाल्टी प्रदान गरेको थियो । जसमा लुकाकु चुकेनन् ।

९०औं मिनेटमा लुकाकुकै पासमा सब्सिच्युट लोउटारो मार्टिनेजले गोल गर्दै इन्टरलाई ४–२ को पूनरागमन जित दिलाए । मार्टिनेज ६५औं मिनेटमा रोबर्टाे ग्याग्लिएरडिनीको स्थानमा मैदान छिरेका थिए ।

यो जितसँगै इन्टर ८ खेलबाट १५ अंक जोडेर पाँचौ स्थानमा उक्लिएको छ । पराजित टोरिनो ५ अंकसहित १८औं स्थानमा रहेको छ । यस्तै सिरी ‘ए’ कै अर्काे खेलमा रोमाले पर्मा काल्सियोलाई ३–० ले पराजित गरेको छ ।

रोमाको जितमा हेनरिक मिखतरयानले दुई तथा बोर्जा मायोरलले एक गोल गरे । जितसँगै रोमा ८ खेलबाट १७ अंक जोडेर तेस्रो स्थानमा उक्लदा पर्मा ६ अंकसहित १६औं स्थानमा छ । यस्तै अर्काे खेलमा बोलोग्नाले साम्पडोरियालाई २–१ ले पराजित गरेको छ ।