एजेन्सी – इंग्लिस स्टार डेविड बेकह्यामले आफ्नो खेलाडी करिअरको उच्च समय समय म्यानचेस्टर युनाइटेड र रियल म्याड्रिडमा बिताए । त्यसपछि एलए ग्यालेक्सी हुँदै पेरिस सेन्ट जर्मेनबाट करिअर अन्त्य गरे ।

खेलाडी जीवनबाट सन्न्यास लिएपछि पनि बेकह्याम पटक पटक फुटबल प्रेमीमाझ विभिन्न कारणले चर्चामा आइरहन्छन् । पछिल्लो समय अमेरिकी लिग मेजर लिग सकरमा आफ्नै टिम इन्टर मायमी फुटबल क्लबका कारण बेकह्याम मिडियामा छाएका थिए । तर पछिल्लो साता भने उनको नाम भिडियो गेमका कारण चर्चामा आएको छ ।

भिडियो गेम क्षेत्रको अग्रणी कम्पनि इए स्पोर्ट्सले निर्माण गर्दै आएको फिफा खेलका लागि बेकह्यामले तीन वर्षको सम्झौता गरेका छन् । यसका लागि बेकह्यामले आफू खेलाडी हुँदाभन्दा बढी रकम प्राप्त गर्ने भएका छन् । बेकह्यामले ३ वर्षका लागि ४० मिलियन पाउन्डमा सम्झौता गरेको खुलासा भएको छ । यस अनुसार उनले प्रति साता २ लाख ५० हजार पाउन्ड प्राप्त गर्छन् ।

सम्झौता अनुसार बेकह्यामको नाम फिफाले खेलको प्रवर्द्धनमा प्रयोग गर्न पाउनेछ । फिफाको अल्टिमेट टिम र भोल्टा विधामा बेकह्याम प्रयोग गरेर आम जनताले खेल्न पाइनेछ । यसका लागि बेकह्यामले पटक पटक खेलका बारेमा प्रवर्द्धन गर्नुपर्ने उल्लेख छ ।

बेकह्यामले आफ्नो ब्रान्डकै कारण ठूलो रकम बुझ्दै यो सम्झौता गर्न सकेको उनी निकट स्रोतले जनाएको छ । सन् २००७ मा रियल म्याड्रिड छोडेर लस एन्जेलस पुग्दा उनले ५ वर्षका लागि २८ मिलियन युरो लिएका थिए । अहिले यो रकम खेलाडी हुँदाभन्दा २ गुणा बढी रहेको छ । रियल म्याड्रिड र म्यानचेस्टर युनाइटेडमा उनले ग्यालेक्सीभन्दा आधा रकम बुझ्थे ।

View this post on Instagram

A post shared by David Beckham (@davidbeckham)