एजेन्सी – बार्सिलोनामा प्रशिक्षक रोनाल्ड कोम्यान आफ्नो युगको सुरुवातको क्रममा छन् । त्यसमा उनले विभिन्न प्रयोग गरिरहेका छन् । जसमा कप्तान लिओनल मेस्सीसहित र उनी विना पनि प्रयोगको प्रयास भइरहेको देखिन्छ ।

च्याम्पियन्स लिगअन्तर्गत बुधबार बार्सिलोनाले फेरेन्कभारोसको सामना गर्दा कोम्यान मेस्सीलाई आराम दिने पक्षमा छन् । गत साता डाइनोमो किभलाई ४–० ले हराएको खेलमा पनि मेस्सीलाई खेलाइएन । टोलीले नकआउट चरणमा स्थान बनाइसकेकोले कोम्यान अर्को खेलमा पनि मेस्सीलाई आराम दिन चाहिरहेका छन् ।

बार्सिलोनामा पछिल्लो पटक एन्टोइन ग्रिजमन र बार्सिलोनाबीचको तालमेल मिल्दै आएको अनुभव गरिएको छ । जसले टोलीको आक्रमण थप मजबुद हुँदै गइरहेको विश्वास गरिएको छ । कोम्यान आफ्नो योजनामा मेस्सीको भूमिका कस्तो रहन्छ भन्ने पनि जान्न चाहिरहेको मानिएको छ ।

‘उनी आक्रमणमा निकै महत्वपूर्ण खेलाडी हुन् । बल उनले भेटेपछि उनको गति देखिन्छ’, उनले भने, ‘सधै ३० गोल गर्न सकिन्न । तर उनको पास स्तरीय छ । टिममो उनको मेहनत र आक्रमण शैलीको महत्व छ ।’

च्याम्पियन्स लिग समूह चरणको पहिलो खेलमा फेरेन्कभारोसलाई बार्सिलोनाले ५–१ ले हराएको थियो । तर, त्यो जितलाई कोम्यान एकदम ठूलो रुपमा लिइरहेका छैनन् ।

‘अबको खेल कठीन हुन्छ । उनीहरुसँग स्तरीय खेलाडी छन् र आक्रमणमा गति छ’, उनले भने, ‘हाम्रा रक्षकहरुले केन्द्रित हुन जरुरी छ । उनीहरुको आक्रमणलाई रोक्नुपर्ने हुन्छ । पाँच रक्षकका साथ युभेन्ट्सविरुद्ध उनीहरुले राम्रो खेलेका थिए । दुर्भाग्य उनीहरु हारे । मुख्य विषय भनेको छनोट हो । हामी भइसकेका छौं । तर हामी सबै खेल जित्दै शीर्षस्थानमा रहन चाहन्छौं ।’