काठमाडौं (हाम्रो खेलकुद)– सतिसाले युनियन केराबारी मोरङ नक्सलबारीमा जारी माघे संक्रान्ती खुला नकआउट फुटबल प्रतियोगिताको सेमिफाइनलमा पुगेको छ ।

टुबोर्ग संजोग स्मृतिको विजेता धनकुटाको रारा फुटबल क्लबलाई ८–० ले हराउँदै सतिसाले अन्तिम चारमा पुगेको हो । शनिबार मात्र साताक्षीधाम स्पोर्टिङ क्लबलाई हराउँदै राराले संजोग स्मृति फुटबल उपाधि जितेको थियो ।

बिट्टु तामाङले ह्याट्रिक खेलेको खेलमा रोमन लिम्बु, दोर्जे तामाङ, तीर्थ बस्नेत र नितिश लिम्बुले गोल गरेका थिए । सूर्य लिम्बुले आत्मघाती गोल गरेका थिए । बिट्टु खेलको म्यान अफ दी घोषित भए । उनले मेडलसहित २ हजार रुपैयाँ प्राप्त गरे । प्रतियोगितामा सोमबार शसस्त्र प्रहरी बल सुनसरी र विराटनगर फुटबल क्लब मोरङबीच प्रतिस्पर्धा हुनेछ ।

नेपाल मगर संघ नक्सलबारी मोरङको आयोजना तथा जन ज्योति क्लब र नक्सलबारी एफसीले संयोजन गर्ने प्रतियोगितालाई गोदावरी विद्या मन्दिर स्कुलले प्रायोजन गरेको प्रतियोगितामा उज्यालो प्रदेश डट कम मिडिया पार्टर रहेको छ ।

त्यस्तै चिसाङ क्रसर उद्योग, उत्तरी मोरङ क्रसर उद्योग र मोरङ कन्स्ट्रसन सह प्रायोजक रहेको प्रतियोगिताको सहयोगीका रुपमा बेलबारी नगरपालिका र नक्सल सामुदायिक बन बेलबारी १ रहेका छन् । उद्घाटन खेल नक्सलबारी एफसी र लेटाङ एफसीबीच प्रतिस्पर्धा हुनेछ ।