काठमाडौं (हाम्रो खेलकुद) – राष्ट्रिय महिला लिगको उद्घाटन खेलमा दुई विभागीय टोली त्रिभुवन आर्मी क्लब र नेपाल पुलिस क्लबबीच प्रतिस्पर्धा हुने भएको छ ।

अखिल नेपाल फुटबल संघ (एन्फा) ले शुक्रबार लिगको पहिलो राउन्डको खेल तालिका सार्वजनिक गर्दा आर्मी र पुलिसबीच प्रतिस्पर्धा हुने भएको हो । ७ माघदेखि ७ फागुनसम्म सञ्चालन हुने लिगका खेलहरु डवल राउन्ड रोविनको आधारमा हुनेछ ।

लिगको उद्घाटन र समापन खेल बाहेकका सबै खेलहरु सातदोबाटोस्थित एन्फा कम्प्लेक्सको खेल मैदानमा हुनेछ । उपाधिको दावेदार विभागीय नेपाल एपिएफ क्लबले दोस्रो दिन चन्द्रपुर नगरपालिकाको सामना गर्नेछ । सोही दिन विराटनगर महानगरपालिका र वालिङ नगरपालिकाबीच प्रतिस्पर्धा हुनेछ । १४ माघमा विश्राम रहेको छ ।

लिगको विजेताले १५ लाख रुपैया हात पार्नेछन् । दोस्रो हुने टोलीले ८ लाख, तेस्रो हुनेलाई ५ लाख तथा चौथो हुने टोलीलाई ३ लाख प्रदान गरिने एन्फाले जनाएको छ । लिगमा विभागीय टोली नेपाल एपिएफ क्लब, त्रिभुवन आर्मी क्लब, नेपाल पुलिस क्लब, वालिङ नगरपालिका स्याङ्जा, चौदन्डीगढी नगरपालिका उदयपुर, चन्द्रपुर नगरपालिका रौतहट र विराटनगर महानगरपालिका मोरङको सहभागिता रहेको छ ।

लिगको सर्वाेत्कृष्ट खेलाडीलाई एक थान स्कुटर प्रदान गरिनेछ । हरेक विधागत उत्कृष्ट खेलाडी र प्रशिक्षक (फरवार्ड, मिडफिल्डर, डिफेन्डर, गोलरक्षक र प्रशिक्षकले समान ५० हजार रुपैया प्रदान गरिनेछ ।

लिगको तयारीका लागि हरेक टोलीलाई १ लाख रुपैया र कोभिड रिलिफ फन्ड अनुरुप ५० हजार प्रदान गरिने एन्फाले जनाएको छ । हरेक खेलको प्लेयर अफ दि म्याचलाई ५ हजार प्रदान गरिनेछ । प्रतियोगितामा विभागीय बाहेक टोलीले चार विदेशी खेलाडी राख्न र खेलाउन पाउनेछ ।

प्रतियोगिता दौरान कुनै खेलाडी वा पदाधिकारीलाई कोरोना शंका लागेको खण्डमा आइसोलेसनको व्यवस्था एन्फाले गर्नेछ । प्रतियोगिता शुरु हुनुअघिको पिसिआर टेस्ट पनि एन्फाले नै गर्नेछ ।