काठमाडौं (हाम्रो खेलकुद) – राष्ट्रिय महिला फुटबल लिग बुधबार सुरु हुँदैछ । दशरथ रंगशालामा २ः०० बजे सुरु हुने उद्घाटन खेलमा दुई विभागिय टोली त्रिभुवन आर्मी फुटबल क्लब र नेपाल पुलिस क्लबबीच प्रतिस्पर्धा हुने एन्फाले जनाएको छ ।

डबल राउन्डका आधारमा हुने लिगको उद्घाटन र समापन खेल दशरथ रंगशालामा र बाँकी खेल सातदोबाटोस्थित एन्फा कम्प्लेक्सको मैदानमा हुनेछ । डेढ दशकयता पहिलो पटक रंगशालमा महिला सिनियर फुटबल खेल हुँदैछ ।

२०६१ मा नेपाल, भारत र सिगांपुरको महिला टोली तथा सोही वर्ष एपिएफले महिला प्रतियोगिता आयोजना गरेको थियो ।७ टोलीको सहभागिता रहेको लिगको पहिलो राउन्डको खेल तालिका एन्फाले सार्वजनिक गरेको छ ।

एन्फाले लिग विजेतालाई १५ लाख रुपैयाँ प्रदान गर्ने यसअघि नै घोषणा गरिसकेको छ । यस्तै लिगको दोस्रो हुने टोलीले ८ लाख, तेस्रो हुनेलाई ५ लाख तथा चौथो हुने टोलीलाई ३ लाख रुपैयाँ प्राप्त गर्नेछन् ।

फागुन ७ गते सम्म हुने लिगमा पुलिस, आर्मीसहित, नेपाल एपिएफ क्लब, वालिङ नगरपालिका स्याङ्जा, चौदन्डीगढी नगरपालिका उदयपुर, चन्द्रपुर नगरपालिका रौतहट र विराटनगर महानगरपालिका मोरङको सहभागिता रहेको छ ।

लिगको सर्वोत्कृष्ट खेलाडीलाई एक थान स्कुटर प्रदान गरिनेछ । हरेक विधागत उत्कृष्ट खेलाडी फरवार्ड, मिडफिल्डर, डिफेन्डर, गोलरक्षक र प्रशिक्षकले समान ५० हजार रुपैयाँ प्रदान गरिनेछ एन्फाले जनाएको छ ।

लिगको तयारीका लागि हरेक टोलीलाई १ लाख रुपैयाँ प्राप्त गरेका थिए भने कोभिड रिलिफ फन्ड अनुरुप ५० हजार प्रदान गरिने एन्फाले जनाएको थियो । हरेक खेलको प्लेयर अफ दि म्याचलाई ५ हजार रुपैयाँ प्राप्त गर्नेछन् । लिगमा विभागीय बाहेकका टोलीले चार विदेशी खेलाडी राख्न र खेलाउन पाउनेछ ।

प्रतियोगिता दौरान कुनै खेलाडी वा पदाधिकारीलाई कोरोना शंका लागेको खण्डमा आइसोलेसनको व्यवस्था एन्फाले गर्ने बताइएको छ । लिग अघि एन्फाले सबै टोलीलाई पिसिआर टेस्ट गर्न निर्देशन दिएको थियो ।