एजेन्सी – बार्सिलोनाका सुपर स्टार लिओनल मेस्सीले इल्चेविरुद्ध हुने खेल खेल्न पाउने छैनन् । स्पेनिस सुपर कपको फाइनलमा रातो कार्डको सामना गरेका मेस्सीलाई दुई खेलको प्रतिबन्ध लगाइएको थियो ।

एथ्लेटिक बिल्बाओविरुद्धको खेलको अन्त्यतिर विपक्षी खेलाडीलाई अनुहारमा हानेपछि मेस्सीलाई रेफ्रीले सिधा रातो कार्ड देखाएका थिए । बार्सिलोनाले प्रतिबन्धका विषयमा पुर्नविचार गर्न स्पेनिस फुटबल संघको प्रतियोगिता समितिमा अपिल गरेको थियो ।

तर, समितिले क्लबको अपिललाई खारेज गर्दै दुई खेलको प्रतिबन्धलाई यथावत राखेको छ । र्कोनेलाविरुद्ध बिहीबार भएको कोपा डेल रेको खेलमा पनि मेस्सीले खेल्न पाएनन् ।

प्रशिक्षक रोनाल्ड कोम्यानले उक्त खेलमा दोस्रो रोजाईका खेलाडीलाई मौका दिएका थिए । प्रतिनबन्धको दोस्रा खेलका रुपमा मेस्सीले इल्चेविरुद्ध आइतबार हुने खेल गुमाउनेछन् । अब मेस्सीले बार्सिलोनाले अर्को साताको मध्यतिर हुने कोपा डेल रेको खेल खेल्ने अपेक्षा गरिएको छ । उनीहरुको प्रतिद्वन्द्वि टोलीका बारेमा शुक्रबार जानकारी हुने बताइएको छ ।

३४ अंकका साथ बार्सिलोना ला लिगाको तेस्रो स्थानमा छ । समान १८ खेल खेलेको रियल म्याड्रिड ३७ अंकका साथ दोस्रो स्थानमा र १ खेल कम खेलेको एट्लेटिको म्याड्रिड ४४ अंकका साथ शीर्षस्थानमा छ ।