एजेन्सी – स्पेनिस ला लिगामा शीर्षस्थानमा रहेको एट्लेटिको म्याड्रिडले भ्यालेन्सियाको सामना गर्दैछ । खेल एट्लेटिकोको मैदानमा नेपाली समयअनुरा राति १ः४५ बजे हुनेछ ।

घरेलु मैदान वान्डा मेट्रोपोलिटानोमा हुने खेलमा एट्लेटिको भ्यालेन्सियामाथि जित निकाल्दै शीर्षस्थानमा आफ्नो अग्रता थप मजवुत बनाउन लक्ष्यमा हुनेछ । एट्लेटिको १७ खेलबाट ४४ अंक जोडेर शीर्षस्थानमा छ ।

दुई खेल बढी खेलको शहरी प्रतिद्धन्द्धी रियल म्याड्रिडको ४० अंक छ । एट्लेटिको रियलभन्दा ४ अंकले अघि छ ।भ्यालेन्सियालाई हराउन सके एट्लेटिकोले रियलविरुद्ध स्पष्ट ७ अंकको अग्रता लिनेछ । टोलीसँग अझै एक खेल हात रहेको छ ।

टोलीसँग लुइस सुआरेज, जोआओ फेलिक्स, थोमस लेमार, यान्निक कारास्को, मार्काेस लोरेन्टे, कोकी, फिलिपे, जोस जिमिनेज, स्टेफन साभिक, एन्जल कोरेया, सउल निग्वेज, सिमे भर्साल्जको र गोलरक्षक जान ओब्लाकको साथ रहेको छ ।

भ्यालेन्सिया पनि एट्लेटिकोलाई हराउदै अंक तालिका सुधार गर्ने लक्ष्यमा हुनेछ । यो सिजन औसतको प्रदर्शन गरिरहेको भ्यालेन्सिया १९ खेलबाट २० अंक जोडेर १४औं स्थानमा रहेको छ ।टोलीसँग म्याक्सिमिलियानो गोमेज, काङ इन लि, गोन्कालो गुइडेज, कार्लाेस सोलेर, युरोस रासिस, युनुस मुसाह, जोस गाया र गोलरक्षक जोउमे रहेका छन् ।

यी दुई टोलीबीचको २५ खेलको नतिजामा एट्लेटिको १२ खेलमा विजयी भएको छ । भ्यालेन्सियाले ४ खेल आफ्नो पक्षमा पार्दा ९ खेल बराबरीमा सकिएको छ । एट्लेटिको भ्यालेन्सियासँग ४ अक्टोवर २०१४ मा ३–१ ले पराजित भएयता, १२ खेलमा अपराजित रहेको छ । जसमा ७ जित र ५ बराबरीको नतिजा निकालेको छ ।