काठमाडौं (हाम्रो खेलकुद)– त्रिभुवन आर्मी फुटबल क्लबले जारी राष्ट्रिय महिला लिगमा पहिलो जित दर्ता गराएको छ । विदेश खेलाडी उतारेको वालिङ नगरपालिकालाई ७–० ले हराउँदै आर्मीले दोस्रो खेलमा पहिलो जित निकालेको हो ।

आर्मीले पहिलो खेलमा अर्को विभागिय टोली नेपाल पुलिस क्लबसँग गोलरहित बराबरी खेलेको थियो । सातदोबाटोस्थित एन्फा कम्प्लेक्सको मैदानमा आइतबार भएको खेलमा आर्मीको जितमा विमला चौधरीले ह्याट्रिक पूरा गरिन् भने दिपा राई, शर्मिला थापा, हेमा चौधरी र भुजना राईले समान १ गोल गरे ।

१४औं विमला गोल गर्दै आर्मीलाई अग्रता दिलाएकी थिइन् । शर्मिलाको फ्लिक हेडरलाई विमलाले वान टचमा जाली चुमाएकी थिइन् । २१ औं मिनेटमा मेथो एलुड रुथले कप्तान कविता धिमालबाट बल खोस्दै गरेको प्रहार बाहिरिदा वालिङ बराबरीबाट चुक्यो ।

२८औं मिनेटमा दिपाले गोल गर्दै आर्मीको गोलअन्तरलाई दोब्बर पारिन् । रश्मी कुमारी घिसिङको क्रसमा सपना लामाले मिलाइदिएको पासलाई दिपाले बल अघि बढाउदै गोल गरेकी थिइन् । पहिलो हाफको अन्तिम मिनेटमा शर्मिलाले गोल गर्दै आर्मीलाई ३–० को अग्रता दिलाइन् । विमलाको प्रहारलाई गोलरक्षक सावित्री किसानले नियन्त्रणमा लिन नसकेको त्यसमा शर्मिलाले गोल गरेकी हुन् ।

६६औं मिनेटमा कियोमेग्नी जोमो भेनेसा नोएलेले क्लियर गर्न नसकेको बललाई विमलाले भलीमार्फत उत्कृष्ट गोल गरिन् । ७५औं मिनेटमा अर्को गोल थर्दै विमलाले ह्याट्रिक पूरा गरिन् । शर्मिलको प्रहारलाई गोलरक्षक सावित्री किसानले बचाएपनि रिवाउन्डमा विमलाले सहज गोल गरिन् ।

जारी लिगमा ह्याट्रिक गर्ने विमला दोस्रो खेलाडी हुन् । यसअघि नेपाल एपिएफ क्लबकी सावित्रा भण्डारी सम्बाले ह्याट्रिक पूरा गरेकी थिइन् । खेल सकिन २ मिनेट बाँकी रहँदा हेमाले गोल गर्दै आर्मीको गोलअन्तरलाई बढाइन् । इन्ज्युरी समयको दोेस्रो मिनेटमा भुजनाले गोल गरेपछि आर्मीको गोल अन्तर अझै थप भएको थियो ।