एजेन्सी – इटालियन सिरी ‘ए’ मा युभेन्टसले बोलोग्नालाई पराजित गरेको छ । घरेलु मैदानमा आइतबार साँझ भएको खेलमा युभेन्टसले बोलोग्नामाथि २–० को सहज जित हात पारेको हो ।

युभेन्टसको जितमा अर्थर र वेस्टन म्याकिन्नीले गोल गरे । पहिलो र दोस्रो हाफमा समान एक–एक गोल भएको थियो । खेलको १५औं मिनेटमा अर्थरले क्रिस्टियानो रोनाल्डोको पासमा गोल गर्दै युभेन्टसलाई १–० को अग्रता दिलाएका थिए ।

२८औं मिनेटमा बोलोग्नाका गोलरक्षक लुकास्जले रोनाल्डो र बर्नरडेस्चीको प्रहारलाई दोहोरो बचाउ गर्दा युभेन्टस अग्रता दोब्बर पार्नबाट चुक्यो । ४८औं मिनेटमा युभेन्टसका गोलरक्षक वजसिएच सेजेस्नीले जुआन कोर्डाडोबाट आत्मघाती हुन लागेको गोललाई उत्कृष्ट बचाउ गर्दै बराबरी टारे ।

५६औं मिनेटमा ओर्साेलिनीको प्रहार पोस्ट नजिकैबाट बाहिरिदा बोलोग्ना बराबरीबाट चुक्यो ।
७१औं मिनेटमा वेस्टन म्याकिन्नीले जुआन कोर्डाडोको पासमा गोल गर्दै युभेन्टसलाई २–० को जित दिलाए । ८२औं मिनेटमा रोनाल्डोले गोल गर्न सकेनन् ।

जितसँगै युभेन्टस १८ खेलबाट ३६ अंक जोडेरचौथो स्थानमा उक्लिएको छ । युभेन्टस शीर्षस्थानको एसी मिलानसँग ७ अंक तथा दोस्रो स्थानको इन्टर मिलानसँग ५ अंकले पछि छ । पराजित बोलोग्ना २० अंक जोडेर १३औं स्थानमा छ ।