एजेन्सी – इंग्लिस प्रिमियर लिग क्लब चेल्सीले आफ्नो मुख्य प्रशिक्षक फ्रान्क लाम्पार्डलाई बर्खास्त गरेको छ ।

चेल्सीले एफए कपको चौथो राउन्डमा लुटोनमाथि ३–१ को जित निकालेको भोलिपल्टै लाम्पार्डलाई बर्खास्त गरेको हो । क्लबले खराब प्रदर्शनलाई निरन्तरता दिएपछि क्लब उनलाई बर्खास्त गर्ने निर्णयमा पुग्यो ।

४२ वर्षीय लाम्पार्डले चेल्सीमा प्रशिक्षकको रुपमा १८ महिना बिताए । यसक्रममा लाम्पार्डको प्रशिक्षणमा चेल्सीले ८४ खेल खेल्दा ४४ जित, १७ बराबरी र २३ हारको नतिजा निकालेको थियो ।

अघिल्लो सिजनको उनको प्रशिक्षणमा चेल्सीले शीर्ष चारमा रहँदै च्याम्पियन्स लिगमा स्थान पक्का गराएपनि यो सिजन चेल्सीको प्रदर्शन बिर्सनलायक बनेको छ । सोही कारण क्लबले उनलाई बर्खास्त गरेको हो ।

चेल्सी यो सिजन २९ अंक जोडेर लिगको नवौं स्थानमा रहेको छ । चेल्सी तथा इंग्ल्यान्डका पुर्व मिडफिल्डर लाम्पार्ड च्याम्पियनसिप क्लब डर्बी काउन्टिको बसाईं बिट मार्दै ४ जुलाई २०१९ मा ३ वर्षको लागि लन्डन क्लब चेल्सीको मुख्य प्रशिक्षक बनेका थिए ।

खेलाडीको रुपमा लाम्पार्डले चेल्सीमा १३ वर्ष बिताउँदा ११ मुख्य उपाधि जितेका थिए । उनले चेल्सीबाट २००१ देखि २०१४ को सिजनसम्म ६४८ खेलमा २११ गोल गरेका थिए । प्रशिक्षकको रुपमा उनी उपाधिविहीन बने ।

चेल्सीले लाम्पार्डको स्थानमा थोमस टुचेललाई ल्याउने तयारी गरेको बताइएको छ । टुचेल अघिल्लो महिना फ्रान्सेली क्लब पेरिस सेन्ट जर्मेन (पीएसजी) बाट बर्खास्तीमा परेका थिए ।