टोटेनह्याम (एजेन्सी) – प्रिमियर लिग थप रोमाञ्चक बन्दै गएको छ । लिगका ७ चरणका खेल सकिदा अधिकांश क्लबले हारको स्वाद चाखिसकेका छन् । यसपटक ६ खेलसम्म पराजय नभोग्ने दुई क्लबमा म्यानचेस्टर सिटी र टोटेनह्याम थिए । तर, अब आइतबारको नतिजापछि एउटा मात्र टोली अपराजित रहेको छ । त्यो हो टोटेनह्याम । घरेलु मैदानमा टोटेनह्यामले सिटीलाई २–० ले हराएको छ । त्योसँगै सिटीको अपराजित यात्रामा पूर्ण विराम लागेको छ । सातौं चरण सम्म एउटा खेल पनि नहार्नेमा अब टोनेह्याम एक्लो क्लब बनेको छ ।
सिटीमा पहिलो सिजन विताइरहेका पेप ग्वार्डिओलाको यो पहिलो हार हो । प्रिमियर लिगका अघिल्ला ६ खेलमा जितेका ग्वार्डिओलाले सबै खाले प्रतियोगितामा आइतबारअघि ११ मध्ये १० खेल जितेका थिए । जितसँगै टोटेनह्याम (१७) अंकतालिकाको दोस्रो स्थानमा उक्लेको छ । १८ अंकसहित सिटी शीर्षस्थानमा यथावत छ ।
आइतबार नै बर्नलीलाई १–० ले हराउँदै आर्सनल अंकतालिकाको तेस्रो स्थानमा उक्लेको छ । समान १६ अंक बटुलेको लिभरपुल चौथो स्थानमा झरेको छ । त्यसअघिका खेलमा म्यानचेस्टर युनाइटेड स्टोक सिटीसँग १–१ को बराबरी खेलेको थियो । त्यस्तै लेस्टर र साउथह्याम्टनले गोलरहित बराबरी खेले ।
एलेकसान्डर कालारोभको आत्मघाती गोलबाट टोटेनह्यामले नवौं मिनेटमा गोलका खाता खोलेको थियो । पहिलो आफका लागि ८ मिनेट बाँकी रहँदा डेले रोनीले टोटेनह्यामको गोलअन्तरलाई दोब्बर पारे । टोलीले दोस्रो हाफमा गोलअन्तर बढाउने अर्को मौका पाएको थियो । तर टोलीका इरिक लामेला पेनाल्टीमा गोल गर्नबाट चुकेका थिए ।
