एजेन्सी – इंग्लिस प्रिमियर लिगको शीर्षस्थानमा रहेको म्यानचेस्टर सिटीले वेस्ट ह्याम युनाइटेडलाई पराजित गरेको छ ।

सिटीले घरेलु मैदानमा वेस्ट ह्याम युनाइटेडलाई २–१ ले पराजित गरेको हो । सिटीको जितमा रुवेन डियास र जोन स्टोन्सले गोल गरे । वेस्ट ह्यामका मिचेल एन्टोनियोले एक गोल फर्काए ।

यो जितसँगै सिटीले अपराजित यात्रालाई २७ खेलसम्म लम्ब्याएको छ । सिटी २१ नोभेम्वरमा टोटेनहम हटस्परसँग २–० ले पराजित भएयता अपराजित छ । जसमा २३ जित र ४ बराबरीको नजिता छ ।

इतिहाद स्टेडियममा शनिबार राति भएको खेलमा घरेलु टोलीले खेलको ३०औं मिनेटमा रुवेन डियासको गोलबाट अग्रता लिएको थियो । उनले केभिन डि ब्रुयनको पासमा गोल गरेका थिए । ४३औं मिनेटमा मिचेल एन्टेनियोले जेसे लिङ्गार्डको पासमा गोल गर्दै खेललाई १–१ गोलको बराबरीमा ल्याए ।

दोस्रो हाफमा सिटीले बल पोसेसनमा बलियो पकड जमाउँदै आक्रमण जारी राख्यो । ६८औं मिनेटमा जोन स्टोन्सले गोल गर्दै सिटीलाई २–१ को अग्रता दिलाए । माहरेजको लो क्रसमा स्टोन्सले पहिलो टचमा नै गोल गर्दै सिटीलाई अघि बढाए । त्यसपछि थप गोल निस्कन नसक्दा सिटी विजयी हुन सफल भयो ।

यो जितसँगै सिटीको २६ खेलबाट ६२ अंक पुगेको छ । सिटीले दोस्रो स्थानको म्यानचेस्टर युनाइटेडलाई १३ अंकले पछि पारेको छ । युनाइटेडको २५ खेलबाट ४९ अंक छ । वेस्ट ह्याम २६ खेलबाट ४५ अंक जोडेर चौथो स्थानमा रहेको छ ।