काठमाडौं (हाम्रो खेलकुद) – सहिद स्मारक ‘बी’ डिभिजन लिगमा खुमलटार युथ क्लबले झम्सिखेल युथ क्लबलाई १–० ले पराजित गरेको छ ।

सातदोबाटोस्थित एन्फा कम्प्लेक्सको खेल मैदानमा आइतबार भएको खेलमा महेश राईले गरेको गोल नै खुमलटारको जितमा निर्णायक बन्यो । खेलको दोस्रो मिनेटमा महेश राईको गोलबाट खुमलटारले १–० को अग्रता बनायो । आयुष घलानको पासमा अनमार्क रहेका महेशले पेनाल्टी बक्सभित्रबाट उत्कृष्ट गोल गरेका थिए ।

१२औं मिनेटमा महेश राईको प्रहार पोस्ट नजिकैबाट बाहिरिदा खुमलटार अग्रता दोब्बर पार्नबाट चुक्यो । ६०औं मिनेटमा मदन स्याङतानको प्रहार फितलो बन्दा झम्सीखेल बराबरीकाट चुक्यो । उनको प्रहार खुमलटारका गोलरक्षक अन्जल श्रेष्ठले सहजै बचाए ।

लगत्तै इनाम तामाङको प्रहार पोस्ट नजिकैबाट बाहिरिदा झम्सिखेल चुकचुकायो । ७७औं मिनेटमा मदन स्याङतानको प्रहारलाई गोलरक्षक अन्जल श्रेष्ठले उत्कृष्ट बचाउ गर्दा झम्सिखेल बराबरीबाट चुक्यो । खेलको अन्त्यतिर झम्सिखेलले अर्काे सुवर्ण अवसर पाएपनि त्यसलाई सदुपयोग गर्न नसक्दा पराजित हुन पुग्यो ।

जितपछि खुमलटारले उपाधि सम्भावनालाई कायमै राख्दा शीर्षस्थानको सातदोबाटो युथ क्लबसँग अंक बराबरी गरेको छ । खुमलटारको ८ खेलबाट १९ अंक पुगेको छ । एक खेल कम खेलेको सातदोबाटोको १९ अंक रहेपनि हेड टु हेडमा खुमलटार दोस्रो स्थानमा छ । पराजित झम्सिखेल ८ खेलबाट ६ अंक जोडेर १०औं स्थानमा यथावत रहेको छ ।

लिगमा सोमबार आरसीटी र टुसाल युथ क्लब तथा सातदोबाटो युथ क्लब र श्री भगवती टोखाबीच प्रतिस्पर्धा हुनेछ ।