एजेन्सी – स्पिनर सुनिल नारायण वेस्टइन्डिजको टोलीमा पूनरागमन गर्न तयार नभएको छनोट समितिले जनाएको छ । वेस्टइन्डिजले श्रीलंकाविरुद्ध यसै सातादेखि सुरु हुने तीन टि२० आई सिरिजको लागि काइरन पोलार्डको कप्तानीमा टोली घोषणा गरेको छ ।

घोषणा भएको टोली अक्टोबर-नोभेम्बरमा भारतमा हुने टि२० विश्वकप केन्द्रित छ । स्पिनरमा नारायण पनि एक प्रमुख दाबेदार हुन् । विश्व चर्चित फ्रेन्चाइज लिग निरन्तर खेल्दै आएका नारायण दुई वर्षदेखि राष्ट्रिय टोली बाहिर छन् । नारायण टोलीमा नहुनुको मुख्य कारण उनी तयार नभएको छनोट समितिले जनाएको छ ।

नारायण आफैंले टोलीमा फर्कन तयार नभएको संकेत दिएको वेस्टइन्डिजका छनोटकर्ता रोजर हार्परले बताएका छन् । ‘नारायण आफ्नो खेललाई अझैपनि राम्रो गर्ने तयारी गरिरहेका छन् । उनी आफैं तयार हुने छन् । उनी तयार नहुँदा हामीले श्रीलंकाविरुद्ध उनलाई सोचेनौं’, छनोटकर्ता हार्परले भनेका छन् ।

नारायणले वेस्टइन्डिजबाट अन्तिम पटक भारतविरुद्ध २०१९ अगष्टमा टि२० खेल खेलेका थिए । त्यसयता वेस्टइन्डिजको टोलीमा छैनन् । ओडिआईमा भने नारायण २०१६ यता स्थान बनाउन सकेका छैनन् ।

नारायणले वेस्टइन्डिजको घरेलु प्रतियोगिता सुपर ५० कप बाट ट्रिनिडाड र टोबागो खेलेका थिए । चोटका कारण फाइनल भने खेल्न सकेनन् । नारायणले आइपिएल कोलकाता नाइट राइडर्सबाट खेल्ने गर्दछन् । नारायणको अनुपस्थीतिमा वेस्टइन्डिजले स्पिनरको रुपमा फबियन एलेन, अकील होसिन र केविन सिन्क्लेयरलाई मौका दिएको छ ।

वेस्टइन्डिजले घरेलु मैदानमा श्रीलंकाविरुद्ध हुने तीन टि२० आई र ओडिआई सिरिजलाई काइरन पोलार्डको कप्तानीमा टोली घोषणा गरेको छ । गेलले दुई र तीव्र गतिका बलर फिडेल एडवर्ड्सले ९ वर्षपछि राष्ट्रिय टोलीमा पूनरागमन गरेका छन् ।

नारायणसँगै अलराउन्डर आन्द्रे रसेल, ब्याट्सम्यान शिम्रन हेटमायर, तीव्र गतिका बलर ओशान थोमस र शेल्डन कटरेल लगायतका चर्चित नाम अटाएका छैनन् । विश्व चर्चित अलराउन्डर आन्द्रे रसेललाई गत महिना कोभिड १९ संक्रमण देखिएको थियो । रसेलको स्वास्थ्य अवस्था सुधारको क्रममा रहेको वेस्टइन्डिजले जनाएको छ ।

युवा ब्याट्सम्यान शिम्रन हेमायर, तीव्र गतिका बलर ओशान थोमस, शेल्डन कटरेल र अलराउन्डर रोस्टन चेश न्यूनतम फिटनेश परिक्षणमा फेल भएपछि टोलीमा नपरेका हुन् । श्रीलंका र वेस्टइन्डिजबीच तीन टि२० आई, तीन ओडिआई र दुई टेष्ट सिरिज हुने छ । पहिलो टि२० खेल ३ मार्चमा हुनेछ । दोस्रो ५ मार्च र तेस्रो ७ मार्चमा हुनेछ ।

पहिलो ओडिआई १०, दोस्रो १२ र तेस्रो १४ मार्चमा हुनेछ । दुई टेष्ट अघि दुई दिने अभ्यास हुनेछ । पहिलो टेष्ट २१ मार्च तथा दोस्रो तथा अन्तिम टेष्ट २९ मार्चदेखि सुरु हुनेछ ।

वेस्टइन्डिजको टि२० टोली :

काइरन पोलार्ड (कप्तान), निकोलस पुरन, फबिएन एलेन, ड्यारेन ब्राभो, फिडेल एडवर्ड्स, क्रिस गेल, आन्द्रे फ्लेचर, जेसन होल्डर, अकील होसिन, इभिन लुइस, ओबेड म्याक्वे, रोभमान पवेल, लेन्डन सिमन्स र केविन सिन्क्लेयर

वेस्टइन्डिजको ओडिआई टोली :

काइरन पोलार्ड (कप्तान), शाई होप, फबिएन एलेन, ड्यारेन ब्राभो, जेसन होल्डर, अकील होसिन, अल्जारी जोशेफ, इभिन लुइस, काइल मेयर्स, जेसन मोहम्मद, निकोलस पुरन, रोमारियो सेफर्ड र केविन सिन्क्लेयर