एजेन्सी – इटालियन सिरी ‘ए’ टोली एसी मिलानका भेट्रान फरवार्ड ज्लाटन इब्राहिमोभिचले युरोपा लिगको प्रि–क्वाटरफाइनलको पहिलो लेगका खेल गुमाउने सम्भावना बढेको छ ।

माशंपेशीको चोटका कारण ज्लाटन दुई साता मैदान बाहिर रहने भएपछि ज्लाटनले युनाइटेडसँगको खेलसँगै सिरी ‘ए’ को दुई खेल गुमाउने सम्भावना बढेको हो । उनले युरोपा लिग अघि सिरी ‘ए’ मा उडिनेस र हेलास भेरोनाको खेल पनि गुमाउन सम्भावना छ ।

मिलान र युनाइेडबीच ११ मार्चमा पहिलो लेगको खेल ओल्डट्राफोर्डमा हुनेछ । दोस्रो लेग मिलानको मैदानमा १९ मार्चमा हुनेछ । दोस्रो लेगमा भने उनी उपलब्ध हुने सम्भवना रहेको बताइएको छ ।

आइतबार रोमामाथि २–१ को जित निकालेको खेलमा ज्लाटनलाई चोट लागेको थियो। चोट लागेपछि उनी खेलको ५६औं मिनेटमा मैदानबाट बाहिरिएका थिए । चोटका बावजुद उनी आफ्नो नियमित प्रशिक्षणमा रहेका छन् ।

चोटका कारण ३९ वर्षीय स्वीडिस फरवार्ड ज्लाटनले ३ वर्षपछि आफ्नो पुर्व क्लब युनाइटेडविरुद्ध उत्रने मौका गुमाउने भएको हो । ज्लाटन २०१८ युनाइटेड छाडेर अमेरिकी मेजर लिग सकर क्लब एल ग्यालेक्सीमा पुगेका थिए ।

दुई सिजन (२०१६–२०१८) मा युनाइटेडमा रहँदा उनले ५३ खेलमा २९ गोल गरेका थिए । जोसे मौरिन्हो प्रशिक्षक रहँदा २०१७ मा उनले युनाइटेडलाई युरोपा लिग र लिग कप जिताएका थिए ।