काठमाडौं (हाम्रो खेलकुद) – निशान सुनारको दुई गोल मद्दतमा एराउन्ड दि हिमालय बाँसबारी क्लबले सहिद स्मारक ‘बी’ डिभिजन लिगमा रेलिगेसन जोनमा संघर्ष गरिरहेको पुल्चोक स्पोर्टिङ क्लबलाई २–० ले पराजित गरेको छ ।

एन्फा कम्प्लेक्समा मंगलबार भएको खेलमा दुवै गोल दोस्रो हाफमा सम्भव भएको थियो । खेलको ३८औं मिनेटमा भिष्मराज घिमिरेले पेनाल्टी बक्सभित्र मिलाइदिएको पासमा निशान सुनारले बललाई नियन्त्रणमा लिन नसक्दा बाँसबारी अग्रता लिनबाट चुक्यो ।

पहिलो हाफको इन्ज्युरी समयको थप गरिएको दोस्रो मिनेटमा भिष्मकै पासमा निशान सुनारले अवसर पाएपनि सदुपयोग गर्न सकेनन् । ४७औं मिनेटमा निशान सुनारले गोल गर्दै बाँसबारीलाई १–० को अग्रता दिलाए ।

सब्सिच्युट गोलरक्षक छेवाङ झाक्री अघि बढेको अवस्थामा प्रतिकार राउतको पासमा निशानले पेनाल्टी बक्सबाहिरबाट गरेको प्रहारलाई पुल्चोकका कप्तान शंकर राईले बचाउने प्रयास गरेपनि सफल भएन ।

६९औं मिनेटमा निशान सुनारले व्यक्तिगत दोस्रो गोल गर्दै बाँसबारीको जित पक्का गरे । प्रतिकार राउतको पासमा निशानले गरेको प्रहारलाई गोलरक्षक छेवाङ झाक्रीले बचाउने प्रयास गरेपनि हातमा लाग्दै गोलमा परिणत भएको थियो ।

जितपछि बाँसबारीले शीर्षस्थानको सातदोबाटो र खुमलटार युथ क्लबसँगको अंक दुरी छोट्याउदै उपाधि सम्भावनालाई जीवितै राखेको छ । बाँसबारीको ८ खेलबाट १८ अंक पुगेको छ ।

शीर्षस्थानको सातदोबाटोको २२ तथा खुमलटारको १९ अंक छ । पराजित पुल्चोक २ अंक जोडेर पुछारमा रहँदा रेलिगेसनको सम्भावना बढेको छ । लिगमा अब तीन राउन्डको खेल बाँकी छ ।

लिगमा बुधबार दुई खेल हुनेछ । पहिलो खेलमा नयाँबस्ती युथ क्लब र टुसाल क्लब तथा दोस्रो खेलमा खुमलटार युथ क्लब र ब्वाइज युनियनबीच प्रतिस्पर्धा हुनेछ ।