एजेन्सी – बार्सिलोना र स्पेनका युवा फुटबल स्टार अन्सु फाती अहिले चोट ग्रस्त छन् । बार्सिलोनाको पहिलो रोजाईमा रहँदै सिजनको सुरुवात गरेका उनी चोटका कारण लामो समयदेखि मैदानबाट टाढा छन् ।

यहि क्रममा उनले राष्ट्रिय टोलीका सहकर्मी एरिक गार्सियाको तारिफ गरेका छन् । उनले आफ्नो खेल सुधार्नका लागि गार्सियाले सहयोग गरेको बताएका छन् । दुवै बार्सिलोनाका एकेडेमीका उत्पादन हुन् ।

व्यसायिक फुटबलमा पनि यी दुई युवाको सहकार्य हुन सक्ने अनुमान गरिएको छ । म्यानचेस्टर सिटीसँगको गार्सियाको सम्झौता सकिने क्रममा छ । त्यसपछि उनी बार्सिलोना जान सक्ने अडकल गरिएको छ।

‘हामीसँगै हुर्केका हौं । हामीले सँगै खेल्यौं । उनले राम्रो गर्नका लागि मलाई सधै सहयोग गरेका छन् । उनलाई ड्रिबल गर्न निकै कठीन छ । सानै देखि त्यसका लागि हामीबीच युद्ध जस्तै हुन्थ्यो,’ गार्सियाका बारेमा फाती यसरी खुले,‘ हामीले स्पेनका लागि पनि सँगै खेलेका छौं । जुन हामीले सानो बेलादेखि सपना देखेका थियौं ।’

फुटबलका ५ सुपर स्टारको छान्न फातीलाई गरिएको आग्रहमा बार्सिलोनाका कप्तान लिओनल मेस्ससहित उनले अन्यको नाम लिए । जसमा केहि आश्चार्यमा पार्ने नाम पनि थिए । फातीले भने, ‘त्यसमा भिक्टोर भाल्डेस, कार्लोस पुयोग, जाभी हर्नान्डेज, आन्द्रे इनियस्टा, मेस्सी र क्रिस्टियानो रोनाल्डो पर्दछन् । ’

एकेडेमीमा पुगेदेखि नै बार्सिलोनाको पहिलो टोलीबाट खेल्ने आफ्नो मुख्य उद्देश्य रहेको दोहोराएका छन् । ‘ एकेडेमीमा आएको पहिलो दिन देखि बार्सिलोनबाट खेल्ने मेरो सपना हो । मेरो सधैको लक्ष्य सिनियर टोलीबाट खेल्नु थियो । त्यसैका लागि मैले मेहेनत गरे, उनले भने,‘ एकेडेमीमा जो पनि आउँछ सबैको एउटै उद्देश्य त्यहि हुन्छ । जति सम्भव हुन्छ त्यति खेल्नको लागि म प्रयास गर्नेछु ।’