एजेन्सी – स्पेनिस फरवार्ड अल्भारो मोराटाको दुई गोल तथा एक असिस्ट दिएपछि युभेन्टसले इटालियन सिरी ‘ए’ मा लाजियोमाथि ३–१ को पूनरागमन जित निकालेको छ ।

घरेलु मैदानमा युभेन्टसले एक गोलले पछि परेको अवस्थामा पुनरागमन जित निकालेको हो । एड्रियन राविओटको एक गोल थप्दा लाजियोका जोआक्विन कोरेआको गोल सान्त्वना बन्यो ।

एलिएन्ज स्टेडियम टोरिनोमा शनिबार राति भएको खेलमा युभेन्टस खेलको १४औं मिनेटमा जोओक्विन कोरेआको गोलबाट पछि परेको थियो । ३९औं मिनेटमा अल्भारो मोराटाको पासमा राविओटले बराबरी गोल फर्काउदै युभेन्टसलाई खेलमा फर्काए ।

चार मिनेटको अन्तरमा मोराटाले दुई गोल गरेपछि युभेन्टसले सहज जित निकाल्न सफल भयो । ५७औं मिनेटमा मोराटाले फेडरिको चिइसाको पासमा गोल गर्दै युभेन्टसलाई २–१ को अग्रता दिलाए ।

६०औं मिनेटमा मोराटाले पेनाल्टीमार्फत गोल गर्दै युभेन्टसलाई ३–१ ले अघि बढाए । मिलिन्कोभिक साभिकले पेनाल्टी बक्समा आरोन राम्सेलाई लडाएपछि रेफ्रीले युभेन्टसलाई पेनाल्टी प्रदान गरेको थियो । जसमा मोराटा चुकेनन् । त्यसपछि थप गोल निस्कन नसक्दा युभेन्टस विजयी हुन सफल भयो ।

यस खेलमा प्रशिक्षक आन्द्रे पिर्लाेले सुपर स्टार फरवार्ड क्रिस्टियानो रोनाल्डोलाई दोस्रो हाफमा मैदान प्रवेश गराएको थियो । उनी ६९औं मिनेटमा मोराटाको स्थानमा मैदान प्रवेश गरेका थिए ।

जितसँगै तेस्रो स्थानमा रहेको युभेन्टसको २५ खेलबाट ५२ अंक पुगेको छ । युभेन्टस शीर्षस्थानको इन्टर मिलानसँग ७ अंकले तथा दोस्रो स्थानको एसी मिलानसँग १ अंकले पछ छ , पराजित लाजियो ४३ अंक जोडेर सातौं स्थानमा रहेको छ ।