काठमाडौं (हाम्रो खेलकुद)– दशरथ रंगशालामा मंगलबार सुरु हुने थ्री नेसन्स कप मैत्रीपूर्ण अन्तर्राष्ट्रिय फुटबलमा नेपाली टोलीको कप्तानीपहिलो रोजाईका गोलकिपर किरण चेम्जोङले गर्ने भएका छन् ।

नियमित कप्तान विराज महर्जन बन्द प्रशिक्षणमा रहेपछि टोलीको अन्तिम छनोट हुन बाँकी रहेकोले टोलीको कप्तानका रुपमा किरण रहने टोलीका मुख्य प्रशिक्षक बालगोपाल महर्जनले सोमबार आयोजित प्रि म्याच कम्फ्रेन्समा बताएका छन् ।

प्रतियोगिता सुरु हुन एक दिन बाँकी रहँदा पनि टोलीको अन्तिम छनोट भने भइसकेको छैन । लामो समय पछि नियमित कप्तान विराज बन्द प्रशिक्षणमा रहेपनि अन्तिम छनोटमा पर्ने नपर्ने एकिन छैन । त्यसैले नेपाली टोलीले किरणको अनुपस्थितिमा उप कप्तान रोहित चन्दलाई पत्रकार सम्मेलनमा प्रस्तुत गरेको थियो ।

आई लिग टोली राउन्ड ग्लास पञ्जाबबाट व्यवसायिक फुटबल खेल्दै आएका किरण सोमबार स्वदेश आइपुग्ने प्रशिक्षक महर्जनले जानकारी दिए । बंगलादेशविरुद्ध भएको मैत्रीपूर्ण खेलपछि मंसिर पहिलो साता किरण उतैबाट भारत गएका थिए । उनले आई लिगमा यो सिजन पञ्जाबबाट सबै १४ खेल खेलिसकेका छन् ।आइतबारमात्रै किरणको टोलीले रियल कास्मिरलाई १–० ले हराएको थियो । आई लिगमा किरणले उच्च प्रदर्शन गर्दै आएका छन् ।

१४ खेलपछि २२ अंकका साथ पञ्जाब अंक तालिकाको चौथो स्थानमा छ । शीर्षस्थानको गोकुलम केरेला, टिडिम रोड एथलेटिक युनियन एफसी, र चर्चिल ब्रर्दशको समान २६ अंक छ । कोभिडका कारण अष्ट्रेलियाविरुद्ध दशरथ रंगशालामा हुने विश्व कप छनोट स्थगित भएपछि नेपालले थ्री नेसन्स कप आयोजना गर्न लागेको हो । थ्री नेसन्स कपमा नेपालसहित बंगलादेशको राष्ट्रिय टोली र कीर्गितस्तानको यू २३ टोलीले प्रतिस्पर्धा गर्नेछन् ।

मुख्य प्रशिक्षक महर्जनले उत्कृष्ट प्रदर्शनका लागि प्रयास गर्ने बताएका छन् । उत्कृष्ट प्रदर्शन गर्न सकेमा नतिजा त्यहिँ अनुसार आउनु विश्वास व्यक्त गरे । ‘ अहिले एक दुई जना बाहेक सबै खेलाडी फिट छन्, उनले भने,‘ जित्छौं भन्नु भन्दा पनि हामी राम्रो प्रदर्शनका लागि प्रयास गर्नेछौं । राम्रो प्रदर्शन हुन सके नतिजा त्यहि अनुसार आउँछ ।’

मंगलबार उद्घाटन खेल बंगलादेश र कीर्गिस्तान यू २३ बीच हुनेछ । नेपालले पहिलो खेल चैत १२ गते कीर्तिस्तान टोलीसँग खेल्नेछ । नेपालले अर्को खेल चैत १४ मा बंगलादेशविरुद्ध खेल्नेछ । राउन्ड रोविन लिगपछि शीर्ष २ टोलीले चैत १६ गते फाइनल खेल्नेछन् । एन्फाले प्रतियोगिताका लागि भिआइपीतर्फ १ हजार ५ सय र साधारण प्यारापिटतर्फ ७ सय टिकटदर तोकेको छ । विजेता टोलीले ५ हजार र दोस्रो टोलीले ३ हजार अमेरिकी डलर प्राप्त गर्नेछ ।