सुनील गाउँले, बारा

सर्लाहीको बागमती यूवा क्लब सिमरामा जारी विश्वकर्मा सिमेन्ट ११ औं जीतपुरसिमरा गोल्डकपको क्वार्टरफाइनलमा प्रवेश गरेको छ । सिमरा रंगशालामा बिहीबार भएको प्रतिष्पर्धात्मक खेलमा चितवनको भरतपुर फुटबल क्लबलाई सडन डेथमा पराजित गर्दै सर्लाहीले क्वार्टरफाइनलमा नेपाल एपिएफसँगको भेट पक्का ग¥यो ।

प्रतिष्पर्धात्मक खेलको टाइब्रेकरपनि २–२ को बराबरीमा रोकिएपछि नतिजा सडनडेथबाट निस्कियो । सडन डेथमा भरतपुरका मनिष तामाङको प्रहार क्रसबार माथिबाट बाहिरीयो भने बागमतीका गोलरक्षक अरुण भ्लोनले विजयी गोल गरेका थिए ।

टाइब्रेकरमा भरतपुरका उमेश राइको प्रहार क्रसबारमा लागेर फर्कियो भने विक्की चाम्लीङ र विपीन गुरुङको प्रहार सर्लाहीका गोलरक्षक अरुण भ्लोनले बचाउ गरे । भरतपुरका राज भुषाल र एकराज बुढाथोकीले टाइब्रेकरमा गोल गरेका थिए ।

त्यस्तै सर्लाहीका निरज थापाको प्रहार पोष्टमा ठोक्किएर फर्कियो । निग्मा घिसिङ र अभि लामाको प्रहार भरतपुरका गोलरक्षक मनोज गुरुङले उत्कृष्ट बचाउ गरे । सर्लाहीका लागि स्टेफन समिर र प्रितम स्याङवोले टाइब्रेकरमा गोल गरेका थिए । यसअघि निर्धारित ९० मिनेट र ३० मिनेट थप समयको खेल गोल रहित बराबरीमा सकिएपछि खेल टाइब्रेकरमा धकेलिएको थियो ।

अन्तिम समयमा १० खेलाडीमा समेटिएको भरतपुरले सर्लाहीलाई कडा चुनौती दिएको थियो । अतिरिक्त समयको १५ औं मिनटमा भरतपुरका डिफेन्डर विपिन मल्ल दोहोरो पहेंलो कार्ड खाँदै मैदानबाट बाहिरिएपछि सर्लाहीले केहि राम्रा अवसर बनाएपनि गोल गर्न सकेन ।

खेलको महालक्ष्मी विकास वैंक म्यान अफ दि म्याच सर्लाहीका गोल रक्षक अरुण भ्लोन घोषित भए । उनले पाँचहजार नगद र ट्रफि प्राप्त गरे । शुक्रबार हेटौंडाको विजय युथ क्लब र सुदुरपश्चिम ११ स्पोर्टस् क्लब धनगढीबीच प्रतिष्पर्धा हुनेछ ।