एजेन्सी – जर्मन बुन्डेसलिगामा साविक विजेता बायर्न म्युनिख यस सिजन पनि उपाधिनजिक पुग्दा शीर्षस्थानमा स्पष्ट ७ अंकको अग्रता कायम गरेको छ ।

शनिबार राति भएको खेलमा तेस्रो स्थानको वल्फ्सवर्गमाथि ३–२ को जित निकाल्दै बायर्नले शीर्षस्थानमा ७ अंकका अग्रता कायम गरेको हो ।बुन्डेसलिगामा अब ५ चरणको खेलमात्रै बाँकी रहेको छ । बायर्नको २९ खेलबाट ६८ अंक पुगेको छ । दोस्रो स्थानमा रहेको आरबी लाइप्जिगको ६१ तथा बायर्नसँग पराजित वल्फ्सवर्गको ५४ अंक छ ।

भोक्सवागन एरिना वल्फ्सवर्गमा शनिबार राति भएको खेलमा बायर्नको जितमा जमाल मुसियालाले दुई तथा इरिक म्याक्सिम चुपो मोटिङले एक गोल गरे । घरेलु टोलीका वोउट वेगह्रस्ट र म्याक्सिमिलियन फिलिपले एक गोल फर्काए । खेलको १५औं मिनेटमा जमाल मुसियालाले अलफन्सो डाभिसको पासमा गोल गर्दै बायर्नलाई १–० को अग्रता दिलाए । २४औं मिनेटमा इरिक म्याक्सिम चुपो मोटिङले गोल गर्दै बायर्नको अग्रता दोब्बर पारे ।

३५औं मिनेटमा वोउट वेगह्रस्टले जासभर सल्गरको पासमा गोल गर्दै खेललाई २–१ को अवस्थामा ल्याए । त्यसको दुई मिनेटपछि जमल मुसियालाले थोमस मुलरको पासमा व्यक्तिगत दोस्रो तथा टोलीका लागि तेस्रो गोल गर्दै बायर्नलाई पहिलो हाफमा ३–१ को अग्रता दिलाए । ५४औं मिनेटमा म्याक्सिमिलियन फिलिपले गोल गर्दै खेललाई ३–२ को अवस्थामा ल्याए । त्यसपछि थप गोल निस्कन नसक्दा बायर्न बविजयी हुन सफल भयो ।

अन्य नतिजा
आरबी लाइप्जिगविरुद्ध होफेनहाइन (०–०), अग्सवर्गविरुद्ध अर्मेनिया बिलेफिल्ड (०–०), बोरुसिया मोन्चेनग्लाडवाकविरुद्ध फ्रान्कफुर्ट (४–०), फ्रेइवर्गविरुद्ध साल्के (४–०), युनियन बर्लिनविरुद्ध भिएफबी स्टुटगार्ट (२–१), बायर लिभरकुसनविरुद्ध एफसी कोल्न (३–०)