एजेन्सी – फ्रान्सेली फरवार्ड केलियन एमबाप्पेको दुई तथा मोउरो इकार्डीको एक गोल सहयोगमा पेरिस सेन्ट जर्मेन (पीएसजी) फ्रेन्च लिग वानमा सेन्ट इटिएनमाथि ३–२ को पूनरागमन जित निकालेको छ ।

घरेलु मैदानमा आइतबार साँझ भएको खेलमा एक गोलले पछि परेको अवस्थाबाट एमबाप्पे र इकार्डीले गोल गर्दै पीएसजीलाई महत्वपुर्ण ३ अंक दिलाए । खेलको अन्त्यतिर गोलको वर्षा भएको खेलमा सेन्ट इटिएनका डेनिस बोआंगा र रोमेन हामोउमाले गोल फर्काए । सबै पाँच गोल दोस्रो हाफमा सम्भव भएको थियो ।

पार्क डेस प्रिन्सेसमा आइतबार साँझ भएको खेलमा घरेलु टोलीले बल पोसेसनमा बलियो पकड बनाएपनि सुरुवातमा गोल खान पुगेको थियो । एक गोलले पछि परेपछि पीएसजीले थप आक्रमक फुटबल खेल्दै जित निकाल्न सफल भएको हो ।

खेलेको ७८औं मिनेटमा डेनिस बोआंगाले मिग्वेल ट्राउकोको पासमा गोल गरेपछि पीएसजी खेलमा पछि परेको थियो । तर, त्यो अग्रता एक मिनेट पनि टिकेन । ७९औं मिनेटमा एमबाप्पेले एन्डर हेरेराको पासमा गोल गर्दै खेललाई १–१ गोलको बराबरीमा ल्याए ।

८७औं मिनेटमा एमबाप्पेले पेनाल्टीमार्फत गोल गर्दै पीएसजीलाई २–१ ले अघि बढाए । पेनाल्टी बक्समा गोलरक्षक इटिन ग्रीनले एमबाप्पेमाथि फल गरेपछि प्राप्त पेनाल्टीमा एमबाप्पे आँफैले गोल गर्दै पीएसजीलाई अग्रता दिलाएका थिए ।

इन्ज्युरी समयको थप गरिएको दोस्रो मिनेटा रोमेन हामोउमाले गोल गर्दै सेन्ट इनिटएनलाई खेलमा २–२ को अवस्थामा ल्याए । इन्ज्युरी समयको थप गरिएको पाँचौ मिनेटमा मोउरो इकार्डीले एन्जल डि मारियाको पासमा गोल गर्दै पीएसजीलाई ३–२ को रोमाञ्चक र प्रतिस्पर्धात्मक जित दिलाए ।

यो जितसँगै साविक विजेतासमेत रहेको पीएसजीले यो सिजन पनि उपाधि जित्ने सम्भावनालाई जीवितै राखेको छ । १ अंकले पछि रहेको दोस्रो स्थानमा रहेको पीएसजीको ३३ खेलबाट ६९ अंक पुगेको छ । समान खेलबाटै शीर्षस्थानमा रहेको लिलको ७० अंक छ । तेस्रो स्थानमा रहेको मोनाकोको ६५ अक छ । पराजित सेन्ट इटिएन ३९ अंक जोडेर १३औं स्थानमा रहेको छ ।