चितवन (हाम्रो खेलकुद) – रड्स क्लब रामपुर र हानामी एभरेष्ट क्लब भरतपुर प्रथम कालिका गोल्डकप फुटबल प्रतियोगिताको क्वार्टरफाइनलमा प्रवेश गरेको छन् ।

आइतबार पहिलो खेलमा अभिषेक चर्च रहजर निर्धारित उपस्थित नभएपछि वाकओभर पाउँदै रड्स रामपुर अन्तिम ८ मापुगेको हो । शनिबार खराब मौसमका झन्डै १८ मिनेटपछि स्थगित भएको रड्स रामपुर र अभिषेक चर्चबीचको खेल आइतबार दिउँसो १ बजे सुरु हुने भनिएको थियो ।
तर अभिषेक चर्च ३ बजेपछि मात्र उपस्थित भएकोले रामपुरलाई विजयी घोषणा गरिएको आयोजक मदन भण्डारी स्पोर्टस एकेडेमी कालिका नगर कमिटी अध्यक्ष पूर्ण चौधरी (निशान) ले जानकारी दिए । रामपुरले अब सेमिफाइनल प्रवेशका लागि युवा जागृती क्लब लोथरको सामना गर्नेछ । आइतबार खेलमा हानामी एभरेष्टले आरआरएफसी हेटौंडालाई टाइब्रेकरमा ४–३ ले हराउँदै अघि बढेको छ । निर्धारित समय खेल १–१ को बराबरीमा टुंगिएपछि खेल टाइब्रेकरमा पुगेको थियो ।

खेलमा अग्रता भने आरआरएफसी हेटौंडाले लिएको थियो । ११ औं मिनेटमा एलिश लामाको गोलमा हेटौंडाले अग्रता लिएको थियो । १९ औं मिनेटमा गोल गर्दै हार्दिक भण्डारीले गोल गर्दै एभरेष्टलाई खेलमा फर्काए । एभरेष्टका सुधिरकुमार श्रेष्ठ खेलको म्यान अफ दि म्याच घोषित भए । सेमिफाइनल प्रवेशका लागि एभरेष्टले एपिएफ भण्डाराको सामना गर्नेछ ।

प्रतियोगितामा सोमबार मदन भण्डारी स्पोर्टस एकेडेमी राप्ती र सेन्ट्रल कलेज भरतपुर फुटबल क्लबबीच प्रतिस्पर्धा हुनेछ । प्रतियोगिताको विजेताले उपाधिसहित १ लाख ११ हजार १ सय ११ रुपैयाँ र दोस्रो हुने टोलीले ५५ हजार ५ सय ५५ रुपैयाँ प्राप्त गर्नेछ ।