एजेन्सी – नेपाली राष्ट्रिय फुटबल टोलीका डिफेन्डर रोहित चन्द सम्मिलित पर्सिजा जकार्ता इन्डोनेसियामा जारी मेन्पोरा कपको फाइनलमा प्रवेश गरेको छ । सडन डेथमा पीएस माकासरलाई ४-३ ले पराजित गर्दै पर्सिजाले फाइनलमा स्थान बनाएको हो ।

दुई लेगमा भएको सेमिफाइनलको दुवै खेल गोलरहित बराबरीमा सकिएपछि खेलको नतिजा टाइब्रेकरमा लिइएको थियो । तर टाइब्रेकरको सुरुवाती ५ प्रहारमा दुवै टोलीले ३-३ गोल मात्र गर्न सके । पर्सिजाका लागि क्रोएसियाली फरवार्ड मार्को सिमिचले पहिलो प्रहार चुकाएपनि रोहित चन्दले दोस्रो प्रहारमा गोल गरेका थिए । पर्सिजाको चौथो प्रहार सफल नहुँदा मकासरको तेस्रो प्रहार गोल हुन सकेन ।

टाइब्रेकरको अन्तिम प्रहारमा माकासरका याकुब सायरीले खेल जिताउने अवसर पाएका थिए । तर उनको प्रहार आकासिएपछि खेल सडन डेथमा लम्बिएको थियो । त्यसपछि सडन डेथमा पनि टोलीले लगातार ४ पेनाल्टी गोल हुन नसक्दा खेल आठौं प्रहारसम्म पुगेको थियो । आठौं प्रहारमा पर्सिजाका टोनी सुचिप्तोले गोल गर्दा माकासरका स्युकुर जुल्किफ्लीले गोल गर्न सकेनन् ।

रोहितले यस प्रतियोगिता अन्तर्गत समूह चरणका खेल गुमाएका थिए । नेपालमा सम्पन्न थ्री नेसन्स कपको उपाधि जित्दा प्रतियोगिताको सर्वोत्कृष्ट खेलाडी चुनिएका रोहितले इन्डोनेसिया पुगेर क्वारेन्टिन बसाइ पुरा गरेर प्रशिक्षणमा जोडिएका थिए । उनले क्वाटरफाइनलमा बारितो पुतेराविरुद्ध १-० को जित र पछिल्लो दुवै खेलमा पूरा समय मैदानमा बिताए ।

पर्सिजाले अब फाइनलमा पर्सिब बानडुङ र पीएस स्लेमानबीच सेमिफाइनलको विजेतासँग खेल्नेछ । पहिलो केग्मा घरेलु टोली पर्सिबले २-१ को अग्रता लिएको थियो । फाइनल खेल पनि २ लेगको नै हुनेछ ।