एजेन्सी – इटालियन सिरी ए को साविक विजेता युभेन्टस एटलान्टासँग पराजित हुँदै अंक तालिकाको चौथो स्थानमा झरेको छ । घरेलु मैदानमा एटलान्टाले १–० को जित हासिल गरेको हो ।

एटलान्टाको जितमा खेल सकिदा ३ मिनेट बाँकी रहँदा रुस्लान मालिनोभ्स्कीले गरेको गोल निर्णायक बन्यो । उनले जोसिप इलिचिचको पासमा गोल गरेका थिए । सुपरस्टार फरवार्ड क्रिस्टियानो रोनाल्डोको अनुपस्थितिमा अल्भारो मोराटा र पाउलो डिबालाले युभेन्टसको आक्रमण सम्हालेका थिए ।

निकै प्रतिस्पर्धात्मक खेलमा युभेन्टसको मिडफिल्ड र आक्रमण सोचेजस्तो चल्न सकेन । लगातार खराब नतिजा निकालेको युभेन्टसको अब च्याम्पियन्स लिग स्थान नै कमजोर हुने डर बढेको छ ।

यस जितले एटलान्टा ६४ अंक जोडेर तेस्रो स्थानमा उक्लदा युभेन्टस ६२ अंक जोडेर चौथो स्थानमा झरेको छ । यस हारले युभेन्टसको उपाधि जित्ने सम्भावना भने लगभग समाप्त भएको छ ।

त्यस्तै इटालियन लिगकै अर्को खेलमा आठ गोल हुँदा लाजियोले बेनेभेन्टोमाथि ५–३ जित निकाल्न सफल रहयो । लाजियोको जितमा सिरो इमोविलेले दुई गोल गर्दा एक गोल जोआक्विन कोरेयाले गर्दा दुई गोल उपहार पाएको थियो ।

बेनेभेन्टोका मार्काे साउ, निकोलस भिओला र कामिल जिलिकले गोल गरे । रोमामा आइतबार राति भएको खलेमा घरेलु टोलीले खेलको १०औं मिनेटमा फावियो दिपावलिको आत्मघाती गोलबाट अग्रता लिएको थियो ।

२०औं मिनेटमा सिरो इमोविलेले गोल गर्दै लाजियोको अग्रता दोब्बर पारे । ३६औं मिनेटमा जोआक्विनले पेनाल्टीमार्फत गोल गर्दै लाजियोलाई फराकिलो जिततर्फ अघि बढाए । पहिलो हाफको इन्ज्युरी समयको थप गरिएको पहिलो मिनेटमा मार्काे साउले रोबर्टाे इन्सिग्नेको पासमा गोल गर्दै खेललाई ३–१ को अवस्थमा ल्याए ।

४८औं मिनेटमा लोरेन्जो मोन्टिपोले आत्मघाती गोल गरेपछि लाजियो ४–१ ले अघि बढ्यो । ५५औं मिनेटमा सिरो इमोविलेले पेनाल्टी चुकायो । ६२औं मिनेटमा निकोलस भिओलाले पेनाल्टीमा गोल गर्दै खेललाई ४–२ को अवस्थामा ल्याए । ६६औं मिनेटमा जियानलुका लापाउडुलाले गोल गरेपनि भिएआरबाट मान्यता नपाउँदा बेनेभेन्टोले गोल अन्तर कम गर्न सकेनन् ।

८५औं मिनेटमा कामल जिलिकले गोल गर्दै खेललाई ४–३ को स्थितिमा ल्याए । तर, इन्ज्युरी समयको थप गरिएको छैटौ मिनेटमा सिरो इमोविलेले व्यक्तिगत दोस्रो तथा टोलीका लागि पाँचौ गोल गर्दै लाजियोलाई ५–३ को जित दिलाए । जितसँगै लाजियो ३० खेलबाट ५८ अंक जोडेर छैटौ स्थानमा रहँदा पराजित बेनेभेन्टो ३० अंक जोडेर १६औं स्थानमा रहेको छ ।