एजेन्सी – प्रिमियर लिग क्लब लेस्टर सिटी एफए कपको फाइनलमा प्रवेश गरेको छ । आइतबार राति भएको सेमिफाइनलमा लेस्टरले प्रिमियर लिग क्लब साउथह्याम्टनमाथि १–० को जित निकाल्दै फाइनलमा स्थान पक्का गरेको हो ।

वेम्वली स्टेडियममा आइतबार राति भएको खेलमा लेस्टरको फाइनल यात्रामा केलिची इहेनाचोले दोस्रो हाफमा गरेको गोल नै निर्णायक बन्यो । उनले ५५औं मिनेटमा गोल गरेका थिए । प्रतिस्पर्धात्मक खेलको चौथो मिनेटमा नै लेस्टरका युरी टिलेमान्सले गोलको अवसर चुकाएका थिए ।

२४औं मिनेटमा जेमी भार्डीले अवसर चुकाए । ५५औं मिनेटमा केलिचीले गोल गर्दै लेस्टरलाई १–० ले अघि बढाए । ७७औं मिनेटमा केलिचीले अवसर चुकाउदो लेस्टर अग्रता दोब्बर पार्नबाट चुक्यो । ७९औं मिनेटमा जेम्स म्याडिसनको प्रहारले पनि पोस्टको दिशा लिन सकेन । अब लेस्टरले उपाधिका लागि लन्डन क्लब चेल्सीको सामना गर्नेछ ।

चेल्सीले शनिबार राति प्रिमियर लिगको शीर्षस्थानमा रहेको म्यानचेस्टर सिटीलाई १–० ले पराजित गर्दै फाइनलमा स्थान पक्का गरेको थियो । फाइनल १५ मेमा हुनेछ ।

८ पटकको च्याम्पियन चेल्सी लगातार दोस्रो सिजन फाइनलमा पुगेको हो । गत सिजन चेल्सी फाइनलमा आर्सनलसँग पराजित भएको थियो । चेल्सी पछिल्लोपटक २०१८ मा च्याम्पियन बनेको थियो । लेस्टर सिटी चारपटक फाइनलमा पुगेपनि हालसम्म एफए कपको उपाधि जित्न सकेको छैन ।