भोजपुर (हाम्रो खेलकुद)– आयोजक टोली अन्तर्राष्ट्रिय आमन्त्रण मेयर भोजपुर गोल्ड कप फुटबल प्रतियोगिताको सेमिफाइनलमा पुगेको छ । निशान लिम्बुको २ गोलसहित ५–२ ले मोरङको सगरमाथा युथ क्लबलाई हराउँदै भोजपुर अन्तिम चारमा पुगेको हो ।

निशानले २ गोल गरेको खेलमा विजय भुजेल, सुवास तामाङ र सुशन तामाङले समान १ गोल गरे । इन्जुरी समयमा सगरमाथाका लागि दोर्जे तामाङ र वीरेन्द्र लिम्बुले गोल गरेपछि टोलीको हार टरेन । भोजपुरका निशानले १७ औं मिनेटमा पहिलो गोल गरे भने विजयले १८ औं, सुवासले २० औं मिनेटमा गोल गर्दै टोलीलाई ३–० को अग्रता दिलाएका थिए ।

निशाले ५६ औं र सुशनले इन्जुरी समयको पहिलो मिनेटमा गोल गर्दा भोजपुरले फराकिलो अग्रता बनाएको थियो । निर्धारित ८० मिनेट खेलपछिको इन्जुरी समयको पहिलो मिनेटमा सगरमाथाका लागि दोर्जेले पेनाल्टीमा र वीरेन्द्रले ८३ औं मिनेटमा गोल गरेका थिए ।

विजेता टोलीका निशान म्यान अफ दी म्याच घोषित भए र उनले ३ हजार ५ सय रुपैयाँ प्राप्त गरे । उनलाई भोजपुर नगरपालिकाका अध्यक्ष कैशालकुमार आलेले पुरस्कृत गरे । झन्डै ३५ लाख रुपैयाँ खर्च हुने प्रतियोगिताको विजेता टोलीले उपाधिसहित ५ लाख, दोस्रो टोलीले ३ लाख रुपैयाँ प्राप्त गर्नेछन् । भोजपुर नगरपालिकाको मुख्य प्रायोजना गरेको प्रतियोगिता वैशाख ११ गते सम्म चल्ने छ ।