एजेन्सी – इंग्लिस प्रिमियर लिगमा सुरुवाती अग्रता जोगाउन नसक्दा लिभरपुल लिड्स युनाइटेडसँग बराबरीमा रोकिएको छ । लिभरपुलले लिड्ससँग १–१ गोलको बराबरी खेल्दै अंंक बाड्न बाध्य बनेको हो ।

इलान्ड रोडमा सोमबार राति भएको खेलमा लिभरपुलका लागि साडियो मानेले गोल गर्दा घरेलु टोलीका डिएगो लोरेन्टेले बराबरी गोल फर्काएका थिए । मानेले पहिलो हाफमा गोल गर्दा लोरेन्टेले दोस्रो हाफमा बराबरी गोल फर्काएका थिए ।

खेलको १८औं मिनेटमा डिएगो जोटाको प्रहारलाई डिएगो लोरेन्टेले ब्लक गर्दै संकट टारे । २३औं मिनेटमा प्याट्रिक बामफोर्डको प्रहार पोस्ट नजिकैबाट बाहिरिदा लिड्स अग्रता लिनबाट चुक्यो । ३१औं मिनेटमा साडियो मानले गोल गर्दै लिभरपुललाई १–० को अग्रता दिलाए । उनले ट्रेन्ट एलेक्सान्डर अर्नाेल्डको पासलाई सदुपयोग गरेका थिए ।

४७औं मिनेटमा रोबर्टाे फिर्मिनोको शक्तिशाली प्रहारलाई लिड्सका गोलरक्षक इलान मेस्लिएरले मुस्किलले बचाउदा लिभरपुल अग्रता दोब्बर पार्नबाट चुक्यो । ७४औं मिनेटमा बामफोर्डको प्रहार क्रसबारमा लागेर बाहिरिदा लिड्स बराबरीबाट चुक्यो ।

८७औं मिनेटमा डिएगो लोरेन्टेले गोल गर्दै खेललाई १–१ गोलको बराबरीमा ल्याए । उनले ज्याक ह्यारीसनको पासमा गोल गरेका थिए । इन्ज्युरी समयको थप गरिएको पहिलो मिनेटमा रोबर्टाे फिर्मिनोले अवसर पाएपनि सदुपयोग गर्न नसक्दा लिभरपुल जितबाट बञ्चित बन्यो ।

यो बराबरीसँगै लिभरपुलले शीर्षचारमा उक्लने मौका गुमाउँदा छैटौ स्थानमा यथावत रहेको छ । लिड्समाथि जित निकाल्न सकेको अवस्थामा लिभरपुलले वेस्ट ह्याम युनाइटेड र चेल्सीलाई पछि पार्ने थियो । छैटौ स्थानमा रहेको लिभरपुलको ३२ खेलबाट ५३ अंक रहेको छ ।

चौथो स्थानको वेस्टह्यामको ३२ खेलबाटै ५५ अंक रहेको छ । एक खेल कम खेलेको चेल्सीको ५३ अंक छ । लिड्स ३२ खेलबाट ४६ अंक जोडेर १०औं स्थानमा रहेको छ ।