एजेन्सी – स्पेनिस ला लिगामा आज राति विभिन्न ६ खेलमा प्रतिस्पर्धा हुदा उपाधि होडमा रहेको रियल म्याड्रिड क्याडिज भ्रमणमा निस्कदैछ ।

क्याडिज र रियल म्याड्रिडबीचको खेल क्याडिजमा नेपाली समयअनुसार राति १ः४५ बजे हुदैछ । क्याडिजमाथि जित निकाल्न सके रियललाई स्पेनिस ला लिगाको शीर्षस्थानमा उक्लने अवसर रहेको छ । क्याडिजलाई हराउन सके रियलले शहरी प्रतिद्धन्द्धी एट्लेटिको म्याड्रिडलाई हेड टु हेडको आधारमा पछि पार्दै कम्तीमा पनि एक दिन शीर्षस्थानमा ओगट्ने छ । रियलको ३१ खेलबाट ६७ तथा एट्लेटिकोको ७० अंक छ ।

रियल क्याडिजलाई हराउँदै शीर्षस्थानमा उक्लने दाउँमा हुनेछ । तर, क्याडिजविरुद्ध रियलको पहिलो रोजाईका ७ खेलाडी टोलीमा हुनेछैनन् । कप्तान सर्जियो रामोस, टोनी क्रुस, फेडे भाल्भेर्डे, फर्लान्ड मेन्डी, लुकास भास्क्वेज, इडेन हाजार्ड र लुका मोड्रिच क्याडिजविरुद्धको खेलमा हुनेछैनन् । मोड्रिचले मंगलबार प्रशिक्षण सेसनमा चोट बोक्न पुगेका थिए । उनी कम्तीमा पनि दुई साता मैदान बाहिर रहनेछ । यसको उनले रियल बेटिस र च्याम्पियन्स लिगमा चेल्सीविरुद्धको खेल गुमाउनेछन् ।

ड्यानी कार्भाहल, राफयल भरान, नाचो फर्नान्डेज र क्यासमिरो चोट र प्रतिबन्धपछि टोलीमा फर्किएका छन् । यस्तै प्रशिक्षक जिदानले क्याडिजविरुद्ध युवा खेलाडीलाई क्याडिजविरुद्धको टोलीमा समेटेका छन् । भिक्टर चस्ट, मिगुइल गुटिरेज, सर्जियो एरिवास र एन्टेनियो ब्लान्को सिनियर टोलीमा समेटिएका छन् । क्याडिजविरुद्ध जिदानले ४–१–४–१ को फर्मेसनमा खेलाउन सक्नेछन् ।

टोलीसँग करिम बेन्जेमा, मारियानो डियास, भिनियिस जुनियर, रोड्रिगो गोएस, क्यासमिरो, इस्को, मार्र्सेलो, इडर मिलिसाओ र गोलरक्षक थिवाउट कोर्टुवा रहेका छन् । यता, क्याडिज पनि रियललाई स्तब्ध पार्दै अंक तालिका सुधार गर्ने दाउमा हुनेछ । क्याडिज ३६ अंक जोडेर १३औं स्थानमा रहेको छ । क्याडिजले गत अक्टोवरमा रियललाई उसकै मैदानमा १–० ले स्तब्ध पारेको थियो । क्याडिज सोही जितलाई निरन्तरता दिने लक्ष्यमा हुनेछ ।

टोलीसँग रुवेन सोब्रिनो, अल्भारो नेग्रेडो, जाइरो, जेन्स जोन्सन, जोस मारी, साल्भी सान्चेज, फाली, अलफोन्सो इस्पिनो, मार्काेस मोउरो र गोलरक्षक जेरेमिएर लेडेस्माको साथ रहेको छ । यि दुई टोलीको दुई भेटमा दुवै टोली १–१ खेलमा विजयी भएका छन् । रियलले २०१५ को कोपा डेल रेमा क्याडिजलाई ३–१ ले पराजित गरेको थियो ।

अन्य खेल
लेभान्टेविरुद्ध सेभिया (राति १०ः४५ बजे), ओसासुनाविरुद्ध भ्यालेन्सिया (राति १०ः४५ बजे), रियल बेटिसविरुद्ध एथलेटिको बिल्वाओ (राति ११ः४५ बजे), एलाभेसविरुद्ध भिल्लारियल (राति १२ः४५ बजे) र इल्चेविरुद्ध रियल भालाडोलिड (राति १२ः४५ बजे)