विराटनगर (हाम्रो खेलकुद)– नेपाली राष्ट्रिय फुटबल टोली तथा नेपाल एपिएफ महिला टोलीकी सदस्य सरु लिम्बु गृह नगरमा सम्मानित भएकी छिन् । पथरी शनिश्चरे महिला फुटबल क्लबले उनलाई सम्मान गरेको हो ।

छोटो समयमा फुटबलका माध्यमबाट देशकै शान बढाउन सफल भएकोमा उनलाई सम्मान गरेको हो । सरुले नेपाली यू १८ र १९ टिमको कप्तानी गरिसकेकी छन् । सरु सम्मलित एपिएफले फागुनमा महिला राष्ट्रिय लिगको उपाधि जितेको थियो । त्यसमा उनी सर्वोत्कृष्ट खेलाडी समेत चुनिएकी थिइन् ।

सुरुसहित राष्ट्रिय टोली र एपिएफकी अनिता केसी, गोलकिपर एन्जिला तुम्बाफो सुब्बा र गिता राना पाकिस्तानमा महिला च्याम्पियनसिप खेल्न गएका थिए । उनीहरु सहभागी मासा युनाइटेड सेमिफाइनल पुगिसकेको थियो । तर पाकिस्तान फुटबल आन्तरिक विवादमा फसेपछि लिग रद्द भएपछि उनी स्वदेश फर्केका थिए ।

अखिल नेपाल फुटबल संघ (एन्फा)का सह–महासचिव वसन्त अर्यालले सम्मान गरेका थिए । कार्यक्रममा मोरङ जिल्ला फुटबल संघका अध्यक्ष दीपेन्द्र धिमाल, वडाध्यक्ष गोविन्दबहादुर भण्डारीको उपस्थिति थियो । सोही अवसर मा राष्ट्रिय टोलीकी खलाडी मनमाया लिम्बूलाई क्लबले मायाको चिनो प्रदान गरेको थियो ।

क्लबकी व्यवस्थापक जमुना आले मगरको सक्रियतामा आयोजना भएको कार्यक्रममा क्लबका प्रशिक्षक विक्रम धिमाल, विराटनगर महानगरपालिका–१ वडाध्यक्ष उद्धव अर्याल, प्रशिक्षक पारस चौधरी, पूर्व खेलाडीद्वय संजीव बुढाथोकी र दीपक राईलगायतको उपस्थिति थियो । सोही कार्यक्रममा विराटनगर–१ का वडाध्यक्ष उद्धव अर्याल र एन्फाका सह–महासचिव अर्यालले क्लबलाई खेल समाग्री प्रदान गरेका थिए ।