एजेन्सी – मार्को इकार्डीको ह्याट्रिकसहित सहज जितका साथ पेरिस सेन्ट जर्मेन (पिएसजी) फ्रेन्च कपको सेमिफाइनलमा पुगेको छ । बुधबार राती भएको खेलमा पिएसजीले एन्जर्समाथि ५–० को जित हासिल गरेको थियो ।

खेल सुरु भएको नवौं मिनेटमा इकाडीले सुरुवाती अग्रता दिलाएका थिए । उनले जुलियन ड्रक्सलरको पासमा गोल गरेका थिए । २३ औं मिनेटमा भिन्सेन्ट मानसेउले आत्मघाती गोल गर्दा पिएसजीको अन्तर दोब्बर भएको थियो । नेयमारले ६५ औं मिनेटमा नजिकबाट गोल गरे । एन्जेल डि मारियको क्रसमा इकार्डीले ६८ औं र अन्तिम मिनेटमा भलीमार्फत गोल गर्दै ह्याट्रिक पूरा गरेका थिए ।

माउरिसियो पोचेटिनोको पहिलो सिजनमा पिएसजीले तीन वटा उपाधि जित्ने सम्भावनालाई कायम राखेको छ । लिग वानमा पिएसजी शीर्षस्थानको लिलभन्दा १ अंकले पछाडि छ । लिग वानमा अझै ५ खेल बाँकी छन् । त्यस्तै टोली च्याम्पियन्स लिगको सेमिफाइन्लमा पुगेको छ । टोलीले फाइनल प्रवेशका लागि प्रिमियर लिग टोली म्यानचेस्टर सिटीको सामना गर्दैछ । यी दुई टोलीबीचको पहिलो लेग अप्रिल २८ मा फ्रान्समा र दोस्रो लेग मे ४ मा इग्ल्यान्डमा हुनेछ ।

टोटेनहमका पूर्व प्रशिक्षक पोचेटिनोले जनवरीमा पिएसजीको नेतृत्व सम्हालेका थिए । हालका चेल्सीका प्रशिक्षक थोमस टुचेललाई बर्खास्त गरेपछि पिएसजीले पोचेटिन्होलाई नियुक्त गरेको थियो । टुचेलको नेतृत्वमा गत सिजन च्याम्पियन्स लिगको फाइनल पुगेको पिएसजीले लिग वान र फ्रेन्च कप जितेको थियो । पिएसजीसहित मोन्टपिलर र चौथो श्रेणीको भालियर्स फ्रेन्च कपको अन्चिम चारमा पुगेको छ । अन्तिम क्वार्टरफाइनल लियोन र मोनाकोबीच हुनेछ ।