एजेन्सी – इटालियन फरवार्ड लोरेन्जो इन्सिग्नेको दुई गोल सहयोगमा नेपोलीले इटालियन सिरी ‘ए’ मा लाजियोमाथि सानदार जित निकालेको छ । घरेलु मैदानमा नेपोलीले लाजियोलाई ५–२ ले हराएको हो ।

घरेलु मैदान डिएको अर्मान्डो म्याराडोना स्टेडियम नेपोलीमा बिहीबार राति भएको खेलमा लाजियोको जितमा लोरेन्जो इन्सिग्नेले दुई गोल गर्दा माटियो पोलिटानो, ड्रिएर मेर्टिन्स र भिक्टर ओसिमहेनले गोल गरे । लाजियोका सिरो इमोविले र सेर्गेज मिलिन्कोभिक साभिकले गोल फर्काए ।

खेलको सातौं मिनेटमा लोरेन्जो इन्सिग्नेको पेनाल्टी गोलबाट नेपोलीले अग्रता लिएको थियो । १२औं मिनेटमा माटियो पोलिटानोले गोल गरेपछि नेपोलीले पहिलो हाफमा २–० को अग्रता लिएको थियो । ५३औं मिनेटमा लोरेन्जो इन्सिग्नेले व्यक्तिगत दोस्रो तथा टोलीका लागि तेस्रो गोल गरेपछि नेपोली सहज जिततर्फ अग्रसर बन्यो । ६५औं मिनेटमा ड्रिएस मेर्टिन्सले गोल गरेपछि नेपोली ४–० ले अघि बढेको थियो ।

७०औं मिनेटमा सिरो इमोविलेले एन्ड्रिएस पेरेइराको पासमा गोल गर्दै खेललाई ४–१ को अवस्थामा ल्याए । ७४औं मिनेटमा सेर्गेज मिलिन्कोभिक साभिकले गोल गर्दै लाजियोलाई खेलमा फर्काउने संकेत दिएका थिए । तर, ८०औं मिनेटमा भिक्टर ओसिमहेनले गोल गर्दै नेपोलीलाई ५–२ को सहज जित दिलाए ।
जितसँगै नेपोली ३२ खेलबाट ६३ अंक जोडेर पाँचौ स्थानमा यथावत रहँदा पराजित लाजियो ३१ खेलबाट ५८ अंक जोडेर छैटौ स्थानमा रहेको छ ।