एजेन्सी – खेल सकिन १४ मिनेट बाँकी रहँदा गोलरक्षक बन्ड लेनोले आत्मघाती गोल गरेपछि इंग्लिस प्रिमियर लिगमा आर्सनलले हार बेहोरेको छ । आर्सनल आत्मघाती गोलले एभर्टनसँग १–० ले पराजित भएको हो ।

इमिरेट्स स्टेडियममा शुक्रबार राति भएको रोमाञ्चक र प्रतिस्पधात्मक खेलमा दुवै टोलीले गोलका केही सुवर्ण अवसरहरु खेर फालेका थिए ।
१४औं मिनेटमा लुकास डिग्नेको क्रसमा डोमिनिक काल्भर्ट लेविनको डाइभिङ हेडर पोस्ट नजिकैबाट बाहिरिदा एभर्टन अग्रता लिनबाट चुकेको थियो ।

३०औं मिनेटमा रिचार्लीसनको प्रहारलाई आर्सनलका गोलरक्षक बन्ड लेनोले उत्कृष्ट बचाउ गर्दै एभर्टनको अग्रता टारे । ४०औं मिनेटमा गिल्फी सिगुर्डसनको २५ यार्ड टाढाको फ्रिकिक प्रहार क्रसबारमा लागेर बाहिरिदा एभर्टन चुकचुकायो । ४९औं मिनेटमा रोव होल्डिङको प्रहारलाई गिल्फी सिगुर्डसनले ब्लक गर्दै खतरा टारे ।

५३औं मिनेटमा आर्सनलले पेनाल्टीको अपिल गरेपनि भिएआरबाट मान्यता पाएन । ६४औं मिनेटमा कलुम चेम्वर चुक्दा आर्सनल पनि अग्रता लिनबाट चुक्यो । ६८औं मिनेटमा एभर्टनका गोलरक्षक जोर्डन पिकफोर्डले ड्यानियल सेवालेसको प्रहारलाई उत्कृष्ट बचाउ गर्दै अर्काे खतरा टारे । ७६औं मिनेटमा एभर्टनले आत्मघाती गोलबाट अग्रता लियो ।

काउन्टर अट्याकमा रिचार्लीसनले क्लोज रेन्जबाट गरेको क्रस लेनोको खुट्टामा लाग्दै गोलमा परिणत भएको थियो । इन्ज्युरी समयको थप गरिएको तेस्रो मिनेटमा थोमस पार्टीको पासमा मार्टिनेलीको प्रहारलाई गोलरक्षक जोर्डन पिकफोर्डले उत्कृष्ट बचाउ गर्दै एभर्टनलाई जित दिलाउदा आर्सनललाई निराश पारे ।

यो जितसँगै एभर्टन ३२ खेलबाट ५२ अंक जोडेर आठौं स्थानमा यथावत रहँदा पराजित आर्सनल ३३ खेलबाट ४६ अक जोडेर नवौं स्थानमा रहेको छ ।