काठमाडौं (हाम्रो खेलकुद) – धनगढी फुटबल क्लब नेपाल सुपर लिग (एनएसएल) अन्तर्गत विराटनगर सिटि फुटबल क्लबसँग पराजित भएको छ । मिडफिल्डमा उच्च प्रदर्शन गरेको विराटनगरले ३-० को सहज जित दर्ता गर्दै ३ अंक जोडेको हो ।

पहिलो हाफमा विक्रम धिमालको गोलमा अग्रता लिएको विराटनगरले दोस्रो हाफमा २ गोल थपेको थियो । विराटनगरका लागि आडेलाजा सोमिडे र सन्तोष तामाङले १-१ गोल गरे । भारतीय प्रशिक्षक यान लको नेतृत्वमा उत्रिएको विराटनगरले १६ औं मिनेटमा नै अग्रता लिएको थियो । पेनाल्टी क्षेत्रभित्र हुलमुलको स्थितिमा विक्रमले गरेको प्रहार गोलमा परिणत भएको थियो ।

पहिलो हाफमा धनगढीले उच्च प्रदर्शन गरेपनि गोल भने गर्न सकेन । दोस्रो हाफमा विराटनगरले सुदृढ डिफेन्स गर्दै आक्रमणलाई निरन्तरता दियो । ५७ औं मिनेटमा आडेलाजाले गोल गर्दै अग्रता दोब्बर पारे । त्यसको १२ मिनेटपछि नै सन्तोषले कमजोर डिफेन्सको फाइदा उठाउँदै अग्रता तेब्बर पारे । यस जितसँगै विराटनगर ३ अंक जोड्दै शीर्षस्थानमा उक्लिएको छ ।

धनगढीका प्रशिक्षक युगलकिशोर राईले टोलीले स्वभाविक प्रदर्शन गर्न नसकेको स्वीकारे । ‘हामीले आक्रमण र डिफेन्स दुवैमा राम्रो खेल्न सकेनौं । पहिलो खेल भएको कारण पनि लय पक्डन केहि कठिन भएको हुनुपर्छ । दोस्रो खेलमा सुधार गर्नेमा विश्वस्त छु,’ उनले भने, ‘पहिलो खेलबाट नै यसको गल्ति भनेर औंल्याउन सकिदैन ।’

यता विराटनगरका प्रशिक्षक लले जित हासिल गरेपनि सुधार गर्ने स्थान रहेको प्रतिक्रिया दिए । ‘सुधार गर्ने धेरै ठाउँ छ । हामीले आज सबै पक्षमा राम्रो पदर्शन गर्यौं तर आउने दिनमा अझ राम्रो गर्नुपर्छ । विशेषगरी आक्रमणमा समन्वय बढाउनुपर्छ,’ उनले भने । प्रशिक्षक लले खेल दिउँसो घामको समयमा भएकाले पनि खेलाडीको फिटनेसमा केहि समस्या परेको बताए ।

आइतबार नै दोस्रो खेलमा बुटवल लुम्बिनी र पोखरा थन्डर्सले खेल्नेछन् ।