एजेन्सी – इटालियन सिरी ‘ए’ मा एसी मिलानले लाजियोसँग लज्जास्पद हार बेहारेको छ । मिलानले लाजियोसँग ३–० को हार बेहोरेको हो ।

स्टेडियो ओलम्पिको रोमामा सोमबार राति भएको खेलमा लाजियोको सहज जितमा जोआक्विन कोरेआले दुई तथा सिरो इमोविलेले एक गोल गरे । पहिलो हाफमा एक तथा दोस्रो हाफमा दुई गोल सम्भव भएको थियो ।

घरेलु मैदानमा लाजियोले खेलको दोस्रो मिनेटमा नै जोआक्विन कोरेआको गोलबाट अग्रता लिएको थियो । उनले सिरो इमोविलेको पासमा गोल गरेका थिए । ४३औं मिनेटमा म्यानुएल लाजारीले गोल गरेपनि भिएआरबाट गोलले मान्यता पाएन । उनी भिएआरमा अफसाइड ठहरिएका थिए ।

५१औं मिनेटमा जोआक्विन कोरेआले व्यक्तिगत दोस्रो तथा टोलीका लागि दोस्रो गोल गर्दै लाजियोको अग्रता दोब्बर पारे । ८७औं मिनेटमा सिरो इमोविलेले म्यानुएल लाजारीको पासमा गोल गर्दै मिलानलाई ३–० को हार चखाए ।

यो हारपछि मिलानले दोस्रो स्थानमा उक्लने अवसर गुमाउँदा पाँचौ स्थानमा रहेको छ । जित निकाल्न सकेको भए मिलानले एटलान्टा, नेपोली र युभेन्टसलाई पछि पार्ने थियो । नेपोली र युभेन्टससँग समान ६६ अंक भएपनि मिलान गोल अन्तरमा पछि परेको हो ।

जितपछि लाजियो ३२ खेलबाट ६१ अंक जोडेर छैटौं स्थानमा यथावत रहेको छ । शीर्षस्थानको इन्टर मिलानको ७९ तथा दोस्रो स्थानको एटलान्टाको ६८ अंक छ ।