एजेन्सी – स्पेनिस क्लब रियल म्याड्रिडका फ्रान्सेली फरवार्ड करिम बेन्जेमाले च्याम्पियन्स लिगको सर्वाधिक गोलकर्ताको सुचीमा चौथो स्थानमा रहेका राउल गोन्जालेजसँगको गोलसंख्या बराबरी गरेका छन् ।

मंगलबार राति इंग्लिस क्लब चेल्सीविरुद्धको च्याम्पियन्स लिगको सेमिफाइनलको पहिलो लेगमा एक गोल गरेपछि बेन्जेमा सर्वाधिक गोलकर्ताको सुचीमा चौथो स्थानमा अटाएका हुन् । उनले रियल म्याड्रिडकै पुर्व स्पेनिस फरवार्ड राउल गोन्जालेजसँगको गोलको कीर्तिमान बराबरी गर्दै संयुक्त रुपमा चौथो स्थान रहेका हुन् ।

राउलले १४२ खेलमा ७१ गोल गरेका थिए । बेन्जेमाले १२६ खेलमा राहुलको कीर्तिमानलाई भेट्टाएका हुन् । ३३ वर्षीय बेन्जेमा सर्वाधिक गोलकर्ताको सुचीमा तेस्रो स्थानमा रहेका रोबर्ट लेवान्डोस्कीभन्दा २ गोलले मात्रै पछि छन् ।

च्याम्पियन्स लिगको सर्वाधिक गोलकर्ताको सुचीको शीर्षस्थानमा पोर्चुगल तथा इटालियन क्लब युभेन्टसका क्रिस्टियानो रोनाल्डो रहेका छन् । उनले १७५ खेलमा १३४ गोल गरेका छन् । दोस्रो स्थानमा रहेको अर्जेन्टिना तथा क्याटलान क्लब बार्सिलोनाका लियोनेल मेस्सीले १४९ खेलमा १२० गोल गरेका छन् ।

तेस्रो स्थानमा रहेको पोलिस तथा जर्मन क्लब बायर्न म्युनिखका रोबर्ट लेवान्डोस्कीले ९६ खेलमा ७३ गोल गरेका छन् । २००९ मा फ्रेन्च क्लब लियोनबाट रियल आएका बेन्जेमाले रियलबाट चारपटक च्याम्पियन्स लिगको उपाधि जितेका छन् ।