एजेन्सी – इंग्लिस क्लब म्यानचेस्टर युनाइटेडले युरोपा लिगको सेमिफाइनलको पहिलो लेगमा इटालियन क्लब रोमामाथि सानदार जित निकालेको छ ।

युनाइटेडले रोमामाथि ६–२ को फराकिलो जित निकालेको हो । युनाइटेडको जितमा ब्रुनो फर्नान्डेस र इडिन्सन काभानीले समान दुई गोल गर्दा पल पोग्वा र मासन ग्रीनवुडले समान एक गोल गरे । रोमाका लोरेन्जो पेलिग्रिनी र इडेन जेकोले गोल फर्काए ।

ओल्ड ट्राफोर्डमा बिहीबार राति भएको खेलमा घरेलु टोली युनाइटेडले खेलको नवौं मिनेटमा ब्रुनो फर्नान्डेसको गोलबाट अग्रता लिएके थियो । उनले इडिन्सन काभानीको पासमा गोल गरेका थिए । १५औं मिनेटमा लोरेन्जो पेलिग्रिनीले पेनाल्टीमार्फत बराबरी गोल फर्काए । रिक कार्सडोर्पको प्रहारलाई पेनाल्टी बक्समा पल पोग्वाले बलले हात छोएपछि रेफ्रीले रोमालाई पेनाल्टी प्रदान गर्दा लोरेन्जो चुकेनन् ।

३४औं मिनेटमा लोरेन्जो पेलिग्रिनीको पासमा इडेन जेकोले गोल गरेपछि रोमाले पहिलो हाफमा घरेलु टोलीविरुद्ध २–१ को अग्रता लिएको थियो । तर रोमाले दोस्रो हाफमा उक्त अग्रतालाई जोगाउन सकेन । पहिलो हाफमा पछि परेको युनाइटेडले दोस्रो हाफमा उच्च प्रदर्शन गर्दै ५ गोल गर्न सफल हुदा सानदार जित निकाल्न सफल भयो ।

४८औं मिनेटमा ब्रुनो फर्नान्डेसको पासमा काभानीले गोल गर्दै खेललाई २–२ गोलको बराबरीमा ल्याए । ६४औं मिनेटमा काभानीले व्यक्तिगत दोस्रो गोल गर्दै युनाइटेडलाई ३–२ ले अघि बढाए । ७१औं मिनेटमा ब्रुनोले पेनाल्टीमा गोल गर्दै युनाइटेडलाई फराकिलो जिततर्फ अघि बढाए ।

७५औं मिनेटमा ब्रुनोको पासमा पल पोग्वाले गोल गरेपछि युनाइटेड खेलमा ५–२ ले अघि बढ्यो । ८६औं मिनेटमा मासन ग्रीनवुडले काभानीको पासमा गोल गर्दै युनाइेटलाई ६–२ को सानदार जित दिलाए । दोस्रो लेगको खेल रोमाको मैदानमा ७ मेमा हुनेछ ।