एजेन्सी – जर्मन मिडफिल्डर काई हाभर्टजको दुई गोल सहयोगमा लन्डन क्लब चेल्सीले इंग्लिस प्रिमियर लिगमा फुलहममाथि २–० को सहज जित निकालेको छ ।

घरेलु मैदान स्टामफोर्ड ब्रिजमा शनिबार राति भएको खेलमा काई हाभर्टजले पहिलो र दोस्रो हाफमा समान एक गोल गरेका थिए । खेलको १०औं मिनेटमा हाभर्टजले गोल गर्दै चेल्सीलाई अग्रता दिलाएका थिए । उनले मासन माउन्टको पासलाई सदुपयोग गरेका थिए ।

४९औं मिनेटमा हाभर्टजले टिमो वेर्नरको पासमा व्यक्तिगत दोस्रो गोल गर्दै चेल्सीको अग्रता दोब्बर पारे । त्यसपछि थप गोल निस्कन नसक्दा चेल्सीले सहज जित निकाल्यो ।

जितपछि चेल्सीले ३४ खेलबाट ६१ अंक जोडेर शीर्ष चारको पकड बलियो बनाएको छ । चेल्सीले पाँचौ स्थानमा रहेको वेस्ट ह्यामलाई ६ अंकले पछि पारेको छ । वेस्ट ह्यामले एक खेल कम खेलेको छ ।

चेल्सीसँग पराजित भएपछि फुलहमको रेलिगेसन सम्भावना बढेको छ । फुलहम २७ अंक जोडेर १८आं स्थानमा रहेको छ । फुलहम रेलिगेसन जोन बाहिर रहेको न्यु क्यासलभन्दा ९ अंकले पछि छ ।

प्रिमियर लिगकै अर्काे खेलमा एस्टन भिल्लाले एभर्टनलाई उसकै मैदानमा २–१ को हार चखाएको छ । एस्टन भिल्लाको जितमा ओले वाट्किन्स र अनवर इल घाँजीले गोल गरे । एभर्टनका डोमिनिक काल्भर्ट लेविनले एक गोल फर्काए । जितपछि एस्टन भिल्ला ४८ अंक जोडेर नवौं स्थानमा उक्लदा एभर्टन ५२ अंक जोडेर आठौं स्थानमा रहेको छ ।