एजेन्सी – क्याटलान क्लब बार्सिलोना तथा स्पेनका युवा फरवार्ड अंशु फातीको घुँडाको दोस्रोपटक शल्यक्रिया गरिएको छ । उनको बिहीबार पोर्चुगलको पोर्टाेमा शल्यक्रिया भएको हो ।

घुँडाको मिनिस्कस इन्ज्युरीका कारण १८ वर्षीय फाती गत नोभेम्वर पहिलो सातादेखि टोली बाहिर रहेका छन् । शल्यक्रिया गर्नुअघि उनले यस विषयमा थुप्रैपटक सल्लाह लिइरहेका छन् । उनको शल्यक्रिया पोर्चुगिज तथा युभेन्टसका सुपरस्टार क्रिष्टियानो रोनाल्डोले निकै विश्वास गरेका चिकित्सक डाक्टर नोरोन्हा र डाक्टर कुगाटले गरेका हुन् ।

‘फातीको घुँडाको मिनिस्कसमा चोट छ । तर शल्यक्रिया गर्दै मिनिस्कसलाई हटाउनु फातीका लागि ठूलो चुनौती हुनेछ । मिनिस्कस हटाएको खण्डमा उनको पुरै करियर नै कठिन हुने र जहिलेपनि उनले यसका लागि सावधानी अपनाउनुपर्ने छ ।’ शल्यक्रिया गर्ने चिकित्सकले बताएका छन् ।

फातीको शल्यक्रिया पोर्चुगलमा भएपनि उनको निरिक्षण बार्सिलोनाका डाक्टरले नै गर्ने भएका छन । यसअघिको चोटमा पनि बार्सिलोनाका डक्टरले नै उनको निरिक्षण गरेका थिए ।

फातीकोशल्यक्रिया गर्ने चिकित्सकले राडामेल फाल्काओ, हल्क, एन्जल डि मारिया र आर्जेन रोवेन लगायतको घुँडाको चोटलाई निको पारेका छन् । पोर्टोमा हुने सो शल्यक्रियापछि फाती चाँडै फिट हुदै मैदान फर्कने विश्वास लिइएको छ । तर, उनले ओलम्पिक र युरोकप गुमाउनेछन् । उनी नयाँ सिजनपछि नै मैदान फर्कने सम्भावना छ ।