एजेन्सी – स्पेनिस ला लिगामा तीन चरणको खेल बाँकी रहँदा उपाधि होड निकै रोमान्चक मोडमा पुगेको छ । शीर्ष ४ टोलीकै गणितीय सम्भावना कायम रहेको अवस्थामा गत साता चारै टोली एक अर्कासँग भिडेका थिए ।

शनिबार भएको बार्सिलोना र एटलेटिको म्याड्रिडको खेलमा जित हासिल गरे विजेता टोली लिग तालिकाको शीर्ष स्थानमा उक्लने थियो । एटलेटिकोले त लगभग लिग उपाधि नै पक्का गर्ने थियो । तर खेल बराबरीमा सकिएपछि दुवै टोलीले फाइदा उठाउन पाएनन् । यो नतिजाले रियल म्याड्रिडलाई भने शीर्षस्थानमा उक्लने अवसर दियो ।

तर आइतबार भएको खेलमा सेभियासँग हारबाट जोगिएपनि रियलले भरपुर फाइदा उठाउन सकेन । बराबरीले रियल दोस्रो स्थानमा भने पुग्यो । अब रियलले उपाधि जित्न एटलेटिकोको खराब नतिजाको प्रतीक्षा गर्नुपर्नेछ । बार्सिलोनालाई भने दुवै म्याड्रिड टोलीको खराब नतिजाको आवश्यकता छ ।

लिग उपाधि समीकरणमा यसपटक हेड टु हेडको नतिजा पनि महत्त्वपूर्ण हुन सक्छ । अंक बराबरी भएमा हेड टु हेडले उपाधि निर्धारण गर्नेछ । र बार्सिलोना दुवै म्याड्रिड टोलीसँग हेड टु हेडमा पछि छ । यसले गर्दा अन्य दुई टोलीको तुलनामा बार्सिलोनाको सम्भावना कम छ । रियल र एटलेटिकोको समान अंक भएमा भने रियल नै शीर्षस्थानमा रहनेछ ।

बार्सिलोनाले अब लिगमा लेभान्ते, सेल्टा भिगो र रेलिगेसनमा परिसकेको एइबारसँग खेल्न बाँकी छ । रियल म्याड्रिडले ग्रानडा, एथ्लेटिक बिल्बाओ र भिल्लारियलसँग खेल्दैछ । एटलेटिकोले रियल सोसीडाड, ओसासुना र रियल भालाडोलिडको सामना गर्नेछ । तुलनात्मक रुपमा रियलको खेल कठिन प्रतिद्वन्द्वीसँग छ । अन्तिम दुई चरणका खेल भने एकै समयमा हुनेछ ।

अंक तालिकामा एटलेटिको म्याड्रिड ७७ अंकसहित शीर्ष स्थानमा छ । रियल र बार्सिलोनाको समान ७५ अंक रहेको छ । लिगमा एक चरणको खेल उथलपुथल हुँदा पनि उपाधि समीकरणमा परिवर्तन आउने देखिन्छ ।

एटलेटिकोको बाँकी खेल :

मे १२ : विरुद्ध रियल सोसीडाड घरेलु खेल : मध्यरात १:४५ (मे १३ विहान)

मे १६ : ओसासुनाविरुद्ध घरेलु खेल : रातको १०:१५ बजे

मे २३ : रियल भालाडोलिडविरुद्ध अवे खेल : रातको ९:४५ बजे

रियलको बाँकी खेल :

मे १३: ग्रानडाविरुद्ध अवे खेल : मध्यरात १:४५ बेज (मे १४ क विहान)

मे १६ : एथ्लेटिक बिल्बाओविरुद्ध अवे खेल : रातको १०:१५ बजे

मे २३ : भिल्लारियलविरुद्ध घरेलु खेल : रातको ९:४५ बजे

बार्सिलोनाको बाँकी खेल :

मे ११ : लेभान्तेविरुद्ध अवे खेल : मध्यरात १:४५ बजे (मे १२को विहान)

मे १६: सेल्टा भिगोविरुद्ध घरेलु खेल : रातको १०:१५ बजे

मे २३ : एइबारविरुद्ध अवे खेल : रातको ९:४५ बजे

यो पनि पढ्नुहोस : युभेन्टसलाई सिरी ए बाट निष्कासनको चेतावनी