एजेन्सी – जर्मन महारथी बायर्न म्युनिखका छाडेका अष्ट्रियन डिफेन्डर डेभिड अलाबा स्पेनिस क्लब रियल म्याड्रिडमा अनुबन्धित भएका छन् ।

अलाबाले रियलसँग ४ वर्षका लागि सम्झौता गरेका हुन् । लेफ्ट ब्याकबाट करिअर सुरु गरेका उनी पछिल्लो समय सेन्टर डिफेन्सका रुपमा खेलिरहेका छन् । उनलाई युरोपमा पछिल्लो समय उत्कृष्ट डिफेन्डरको रुपमा हेरिएको छ ।

रियलका कप्तान तथा सेन्टर ब्याक सर्जियो रामोस ३४ वर्ष पार गरिसकेको र सम्झौता सकिएपछि अहिले रियल नयाँ डिफेन्डरको खोजीमा थियो । रियलले सेन्टर ब्याकमा पोउ टोरेस, जुलेस कोउन्डे र डिएगो कार्लाेसलाई नजर लगाएपनि म्याड्रिड अलाबा अनुबन्धमा पुगेको हो ।

अलाबालाई बायर्नले क्लबमै राख्न तीन पटक प्रस्ताव गरेपनि उनले क्लब छाड्ने निर्णयमा लिएका थिए । सन् २००८ मा बायर्नमा आएका भर्सटाइल डिफेन्डर अलाबाले त्यसपछि लोनमा ६ महिना अर्काे जर्मन क्लब होफेनहाइनमा पुगेका थिए । त्यसपछि उनी निरन्तर बायर्नमै रहेका थिए ।

अलाबाले बायर्नका लागि हालसम्म ४ सय बढी खेल खेल्दै खेलमा ३२ गोल र ४९ असिस्ट दिँदै २७ उपाधि जितेका छन् । जसमा दुई च्याम्पियन्स लिग, १० जर्मन बुन्डेसलिगा, ६ डिएफवी पोकल, ५ जर्मन सुपर कप, २ युइएफए सुपर कप र दुई क्लब विश्वकप रहेको छ ।