काठमाडौं (हाम्रो खेलकुद) – नेपाली राष्ट्रिय फुटबल टोलीले शनिबार इराकविरुद्ध मैत्रीपूर्ण खेलमा हार बेहोर्यो । इराकको घरेलु मैदानमा ६-२ ले पराजित भएपनि एक समय पहिलो हाफमा नेपाल २-१ ले अघि रहेको थियो ।

खेलको सुरुवातमै पछि परेको नेपालले एक मिनेट नबित्दै अन्जन विष्टको मदतले बराबरी गोल फर्कायो । त्यसपछि मनिष डाँगीले उत्कृष्ट गोल गर्दै नेपाललाई अग्रता दिलाएका थिए । मिडफिल्डबाट सन्तोष तामाङले दिएको थ्रु बललाई मनिषले गोलरक्षक अघि बढेको मौका छोपेर पेनाल्टी क्षेत्र बाहिरबाट गोल गरेका थिए । राष्ट्रिय टोलीबाट डेब्यु गरेकै खेलमा १९ वर्षीय मनिष गोल गर्न सफल रहे ।

खेलपछि मनिषले व्यक्तिगत रुपमा गोल गरेपनि नतिजा आफ्नो पक्षमा नआउँदा भने दुख व्यक्त गरे । ‘हामीभन्दा धेरै राम्रो स्तरको खेलाडी भएको टोली थियो इराक । उनीहरुविरुद्ध खेल्नु राम्रो अनुभव रहयो । नतिजा हाम्रो लागि राम्रो रहेन तर धेरै कुरा सिक्न पायौं,’ उनले भने ।

‘डेब्युमा गोल गर्दा खुसी छु । तर नतिजालाई लिएर दुख लागेको छ । भविष्यमा अझ मिहिनेत गरेर राम्रो प्रदर्शन गर्न चाहन्छु ।’

मनिष नेपाल सुपर लिग (एनएसएल) मा विराटनगर सिटी फुटबल क्लबबाट प्रभावशाली प्रदर्शन गरेपछि प्रशिक्षक अब्दुल्लाह अलमुताइरीको रोजाइमा परेका थिए । उनले त्यसअघि खालीबारी एफसी बाट सी डिभिजन र मोफसलका प्रतियोगितामा थ्री स्टारबाट पनि खेलेका थिए । मनिषले उमेर समूहमा नेपाल यू-१९ को जर्सी पनि लगाइसकेका छन् ।

यो पनि : इराकविरुद्ध हारबारे यसो भन्छन् प्रशिक्षक अलमुताइरी