एजेन्सी – फ्रान्स तथा इंग्लिस क्लब आर्सनलका पुर्व मिडफिल्डर थिएरी हेनरी बेल्जियमको प्रशिक्षण टोलीमा समावेश भएका छन् । उनी दोस्रोपटक बेल्जियमको प्रशिक्षण टोलीमा समावेश भएका हुन् ।

उनले मुख्य प्रशिक्षक रोबर्टाे मार्टिनेजको सहायक प्रशिक्षकको रुपमा युरोकपमा रहनेछन् । उनले यसअघि २०१६ देखि २०१८ सम्म मार्टिनेजको सहायक प्रशिक्षकको रुपमा काम गरिसकेका छन् । उनी २०१८ मा फ्रान्सेली क्लब मोनाकोका प्रशिक्षक बनेका थिए ।

४३ वर्षीय हेनरीले आसन्न युरोकपमा टिभी पन्डितको रुपमा काम गर्नुपर्ने भएपनि च्याम्पियनसिप आउन एक साता बाँकी रहँदा उनी बेल्जियमको प्रशिक्षणमा जोडिएका हुन् । अब उनी रेड डेभिलको डगआउटमा हुनेछन् ।

बेल्जियमले हेनरी फिर्ताको समाचारलाई पुष्टि गर्दै छोटो वक्तव्यमा, ‘‘अधुरो व्यवसाय’ हामी युरोकप २०२० का लागि कोचिङ स्टाफको रुपमा हेनरीलाई स्वागत गर्दछौं ।’ भनेर लेखेको छ । बेल्जियमले २०१८ को विश्वकपमा तेस्रो स्थान हासिल गर्दा उनी टोलीको दोस्रो सहायक प्रशिक्षक रहेका थिए ।

ग्रेम जोन्स पनि मार्टिनेजको सहयोगी रहेका थिए । जोन्सले विश्वकप पछि नै सहायक प्रशिक्षक छाड्दा हेनरीलाई सहायक प्रशिक्षकमा बढुवा गरिएको थियो । तर, हेनरी पनि अक्टोवरमा मोनाकोका प्रशिक्षक बन्न पुगेका थिए । मोनाकोमा उनको प्रशिक्षणमा टोलीले खराब प्रदर्शन गरेपछि उनी तीन महिनामै बर्खास्त हुन पुगे ।

त्यसपछि उनी नोभेम्वरमा एमएलएस क्लब मोन्टरियल इम्प्याक्टमा प्रशिक्षक बनेका थिए । उनले परिवारलाई समय दिने भन्दै गत फेब्रुअरीमा मोन्टरियलबाट बाहिरिदै परिवारसँग लन्डनमा बस्दै आएका थिए ।

बेल्जियमको गोल्डेन जेनेरेसन जहाँ केभिन डि ब्रुयन, रोमेलु लुकाकु र इडेन हाजार्ड जस्ता खेलाडी रहेका छन् । युरोकपमा समूह ‘बी’ मा रहेको बेल्जियमले रसिया, फिनल्यान्ड र डेनमार्कको सामना गर्दैछ ।