काठमाठौं (हाम्रो खेलकुद)– कोरोना महामारीका कारण पटक पटक स्थगित नेपालसम्मिलित विश्व कप छनोटको समूह चरण अन्ततः बिहीबार सुरु हुँदैछन् । कुल ८ मध्ये ५ खेल खेलिसकेको नेपालले अन्तिम ३ खेलको सुरुवात बिहीबार गर्दैछ ।

न्यूट्रल भेन्यूका रुपमा कुवेतमा हुने छनोटमा चाइनिज ताइपेसँग खेल्दै यसपटकको यात्रा सुरु गर्दैछ । गत साता इराकसँग एउटा मैत्रीपूर्ण खेल खेल्दै नेपाली राष्ट्रिय फुटबल टोली आइतबार कुवेत पुगेको छ । जेठ २४ गते जोर्डन र जेठ २८ गते अष्ट्रेलियासँग खेल्दै नेपालले विश्व कप २०२२ र एसिया कप २०२३ को छनोटको यात्रको अन्त्य गर्नेछ ।

विश्व कप छनोटमा अघिल्लो चरण पुग्ने नेपालको गणितिय सम्भावना त जीवत छ । तर प्रतिद्वन्द्वि टोलीको इतिहास र उनीहरुविरुद्ध हाम्रो प्रदर्शनलाई हेर्दा अघिल्लो चरण पुग्ने सम्भावनामा धेरैलाई आशा छैन । नेपाल समूह चरणमा ३ अंकसहित चौथो स्थानमा छ । अष्ट्रेलियाको १२ अंक छ भने जोर्डन र कुवेतको समान १० अंक छ । नेपाल भन्दा पछि रहेको चाइनिज ताइपेले अंक जोड्न सकेको छैन ।

एसिया कपको छनोटको समीकरणमा भने ठूलो फेरबदल हुनसक्छ । त्यसका लागि यी तीन खेलमा आउने नतिजामा भर पर्दछ । विश्व कप छनोटमा ५ खेलमा नेपालले चाइनिज ताइपेलाई २–० ले हराउँनु बाहेक बाँकी सबै टोलीसँग पराजित भएको थियो । कुवेतसँग पहिलो खेलमा ७–० को हार बेहोरेको नेपालले अर्को खेल १–० ले गुमाएको थियो । अष्ट्रेलियासँग ५–० र जोर्डनसँग ३–० को हार बेहोरेको थियो ।

नेपालले आफ्नो समूहमा चौथो स्थान हासिल गर्दै अन्य समूहमा रहेको चौथो टोलीको तुलना गर्दा शीर्ष ४ स्थानमा पर्न सके सिधै एसिया कप छनोटको तेस्रो चरण खेल्न पाउँछ । यदि पुछार वा चौथो स्थानमा रहेर पनि अन्यको समूहको चौथो स्थानको तुलनामा शीर्ष ४ मा नपरे नेपालले प्लेअफ खेल्नुपर्ने हुन्छ ।

नेपालले खेल्न बाँकी तीनै टोली नेपाल भन्दा फिफा वरियतामा छन् । एसियाको पावर हासका रुपमा रहेको अष्ट्रेलिया फिफा वरियताको ४१ औं स्थानमा छ भने जोर्डन ९५ औं स्थानमा छ । त्यस्तै चाइनिज ताइपे १ सय ४१ औं र नेपाल १ सय ७१ औं स्थानमा छ । नेपालले अष्ट्रेलिया र जोर्डनलाई अहिले सम्म हराउन सकेको छैन । जोर्डनविरुद्धको नेपालको उच्च प्रदर्शन भनेको एक दशक अघि दशरथ रंगशालमा भएको विश्व कप छनोटमा १–१ को बराबरी हो । त्यसमा भरत खवासले नेपालका लागि गोल गरेका थिए ।

नेपालले खेल्ने तीन टोलीसँग यसअघिको नतिजाका यस्तो छ ।

विरुद्ध चाइनिज ताइपे

६ जुन २०१९ : बराबरी १–१ (अभिषेक रिजाल) मैत्रीपूर्ण खेल

१० सेप्टेम्बर : जित २–० ( दुवै अन्जन विष्ट) विश्व कप छनोट

विरुद्ध जोर्डन

२३ जुलाई २०११ : हार ० –९ – विश्वकप छनोट

२८ जुलाई २०११ : बराबरी १ –१ (भरत खवास) विश्व कप छनोट

१५ अक्टुबर २०१९ : हार ० –३ विश्व कप छनोट

विरुद्ध अष्ट्रेलिया

१० अक्टुबर २०१९ : हार ० –५ – विश्व कप छनोट