एजेन्सी – युरोकप तयारीको लागि भएको अन्तर्राष्ट्रिय मैत्रीपुर्ण खेलमा इंग्ल्यान्डले जित दर्ता गर्दा जर्मनीले बराबरीको नतिजा निकालेको छ ।

बुधबार राति घरेलु मैदानमा इंग्ल्यान्डले अष्ट्रियामाथि १–० को झिनो जित निकालेको हो । इंग्ल्यान्डको जितमा बुकायो साकाले दोस्रो हाफमा गरेको गोल नै निर्णायक बन्यो । उनले ५७औं मिनेटमा गोल गरेका थिए ।

प्रतिस्पर्धात्मक खेलमा दुवै टोलीले गोलका केही सुवर्ण अवसर खेर फालेका थिए । यो नतिजासँगै इंग्लयान्डले पछिल्लो पाँच खेलमा शतप्रतिशत जित निकालेको छ । गत नोभेम्वरमा बेल्जियमसँग २–० ले पराजित भएयता इंग्ल्यान्ड अपराजित छ । अष्ट्रियाको भने यो लगातार दोस्रो हार हो ।

यस्तै अर्काे खेलमा सुरुवाती अग्रता लिएरपनि जोगाउन नसक्दा जर्मनीले डेनमार्कसँग १–१ गोलको बराबरी खेलेका छन् । प्रतिस्पर्धात्मक खेलको ४८औं मिनेटमा फ्लोरियन नेउहसको गोलबाट जर्मनीले अग्रता लिएको थियो । ७१औं मिनेटमा युसुप पउलसेनले बराबरी गोल फर्काएका थिए ।

अर्काे मैत्रीपुर्ण खेलमा जर्मनीले ८ जुनमा लात्भियासँग प्रतिस्पर्धा गर्नेछ । त्यसपछि जर्मनीले युरोकपमा फ्रान्स, पोर्चुगल र हंगेरीको सामना गर्नेछ । यस्तै डेनमार्कले बोस्निया एन्ड हर्जगोभिनासँग खेल्दै युरोकपको तयारी सकाउनेछ । डेनमार्क रहेको समूहमा फिनल्यान्ड, बेल्जियम र रसिया रहेका छन् ।