एजेन्सी – इटालियन च्याम्पियन इन्टर मिलानले सिमोन इन्झागीलाई टोलीको मुख्य प्रशिक्षकमा नियुक्त गरेको छ । इन्टर मिलानलाई च्याम्पियन बनाएपछि एन्टेनियो कोन्टेले प्रशिक्षक पदबाट राजीनामा दिएपछि क्लबले उनको स्थानमा इन्झागीलाई टोलीको मुख्य प्रशिक्षकमा नियुक्त गरेको हो ।

इन्टरले इन्झागीलाई दुई वर्षको लागि क्लबको मुख्य प्रशिक्षक बनाएको हो । उनी सन् २०२३ को अन्त्यसम्म सान सिरोमा रहनेछन् । यसअघि उनी इटालियन क्लब लाजियोमा रहेका थिए । इन्झागी २०१६ देखि लाजियोका प्रशिक्षक रहेका थिए । अब ४५ वर्षीय इटालियन प्रशिक्षक इन्झागी इन्टर मिलानको डगआउटमा हुनेछन् ।

क्लबको आधिकारिक वेवसाइटमा मिलानको प्रशिक्षकको रुपमा ईन्झागीलाई २ वर्षको लागि अनुबन्ध गरिएको उल्लेख छ । इन्झागीले लाजियोको सीमित बजेटका बावजुत टोलीलाई आफ्नो प्रशिक्षण कालमा तीन उपाधि जिताएका थिए । क्लबले स्टेफानो पिओलीलाई २०१६ मा बर्खास्त गरेपछि उनी लाजियोको अन्तरिम प्रशिक्षक बनेका थिए ।

त्यसपछि मार्सेलो बिएल्सा टोलीको मुख्य प्रशिक्षक बनेका थिए । मुख्य प्रशिक्षक बनेको दुई दिनमै उनले आफ्नो आन्तरिक कारण देखाउँदै टोलीबाट बाििरएपछि लाजियोले उनलाई मुख्य प्रशिक्षकको जिम्मेवारी प्रदान गरेको थियो । लाजियोकै पुर्व खेलाडी रहेका उनको प्रशिक्षणमा लाजियोले २०१७ र २०१९ मा सुपर कोपा इटालिया र २०१८–१९ को सिजनमा कोपा इटालियाको उपाधि जितेको थियो ।

उनकै प्रशिक्षणमा लाजियो १३ वर्षपछि अर्थात २००१ पछि च्याम्पियन्स लिगलाई छनोट हुदा पहिलोपटक च्याम्पियन्स लिगको प्रि–क्वाटरफाइनलम पुग्न सफल भएको थियो ।