एजेन्सी – ब्राजिलियन फुटबल टोलीका केहि खेलाडीले कोरानाका कारण उत्पन्न स्वास्थ्य खतराका कारण कोपा अमेरिका नखेल्ने मनसाय देखाएका छन् । टोलीका प्रशिक्षक टिटेले पनि त्यसलाई स्वीकार गरेका छन् ।

सुरुमा अर्जेन्टिना र कोलम्बियाले आयोजना गर्ने भनिएको कोपा अमेरिका पछि अर्जेन्टिनामा मात्र आयोजना गर्ने निर्णय भएको थियो । कोलम्बियामा राजनीतिक अस्थिरता बढेको भन्दै अर्जेन्टिनालाई मात्र जिम्मेवारी दिएको थियो । अर्जेन्टिनामा पनि कोराना संक्रमितको संख्यामा व्यापक बृद्धि भएपनि कोपा अमेरिका ब्राजिल सार्ने निर्णय भएको थियो ।

ब्राजिलमा पनि कोरोना संक्रमितको संख्या देशभर बढी रहेको छ । त्यसको डर खेलाडीले पनि मानेका छन् । अहिले ब्राजिलमा कोरोना महामारीलाई लिएर सरकारले बेवास्ता गरेको भन्दै दिनहुँ प्रदर्शन भइरहेको । यस्तो अवस्थामा ब्राजिलले नै आयोजना गर्ने निर्णयबाट ब्राजिलियन खेलाडी खुसी नरहेको बताइएको छ ।

त्यसैकारण इक्वेडरविरुद्धको विश्व कप छनोट अघिको प्रि म्याच कन्फ्रेन्समा टोलीका कप्तान कासिमेरो उपस्थित भएनन् । उनी उपस्थिति नहुनुको कारण बारे टिटेले भने, ‘प्रतियोगिता आयोजनाका विषयमा गरिएको राष्ट्रपतिको निर्णयविरुद्ध खेलाडीको धारणा प्रष्ट छ । त्यसै कारण कासिमेरो आज उपस्थित भएनन् ।’

ब्राजिलका राष्ट्रपतिकै आग्रहमा कन्मेबलले प्रतियोगिता ब्राजिलमा सारेको थियो । ब्राजिलका जनताले भने सरकारको ध्यान कोरोना नियन्त्रणमा हुनुपर्ने बेलामा कोपा आयोजनामा ध्यान दिएको भन्दै आलोचना गरेका छन् ।

ब्राजिलले कोपा अमेरिकाको पहिलो खेल जुन २७ मा इक्वेडरविरुद्ध खेल्नुपर्ने तय छ । अझै पनि कोपा हुनु नहुनेमा दुविधा रहेको बताइन्छ । यदि भएको खण्डमा ब्राजिलका मुख्य खेलाडीहरुलाई नखेल्ने सम्भावना रहेको अनुमान गरिएको छ ।